Sulmuesi i Bayern Munich Robert Lewandowski, në një intervistë për televizionin gjerman “SportBild”, foli për fëmijërinë dhe idhujt e tij të rinisë. Emrat e lakuar nga sulmuesi ishin shumë por si modelin e tij cilëson ish-sulmuesin e Juventusit, Alesandro Del Piero.
“Mbaj mend që kur isha gjashtë vjeç ishte vetëm një idhull për mua: Roberto Baxho. Më vonë Alessandro Del Piero u bë model im , e admiroja shumë. Sidoqoftë, ende nuk mund të gjykoja saktësisht se çfarë e karakterizonte stilin e tij të lojës, isha shumë i ri. Më vonë më bëri përshtypje legjenda e Arsenalit, Thierry Henry, më pëlqenin lëvizjet e tij, goditjet e tij në thellësi, golat e tij dhe fitoret që arrinte ekipi me të në fushë. Doja ta imitoja në gjithçka“.
Ndërkohe kur u pyet se cili është lojtari më i mirë i të gjitha kohërave ai u përgjigj: “Nuk mund të identifikoj një lojtar të vetëm, sepse janë lojtarët ata që formojnë epokat e ndryshme. Në 10-15 vitet e fundit ka qenë Messi, Cristiano Ronaldo, Ronaldinjo. Para tyre ishte Ronaldo Fenomeni. Ka gjithmonë talente të jashtëzakonshme, që transmetojnë gëzim në futboll. Kampionët i bëjnë edhe gjërat më të vështira të lehta dhe të thjeshta “, u përgjigj sulmuesi i Bayern-it, i cili nga shumë konsiderohet si një ndër sulmuesit më të fortë të historisë së futbollit.
