Ankesa e ish-presidentit të Vllaznisë, Valter Fushaj, është marrë parasysh nga Komisioni Publik i Tenderimit, çka ka bërë që grupi i ngritur nga Bashkia Shkodër për këtë proces, të shtyjë ankandin për shitjen e klubit të futbollit.
Në vendimin e Komisionit të Tenderimit Publik thuhet se pezullohet procedura e ankandit dhe nuk lejohet të kryhet asnjë veprim nga autoriteti kontraktor deri në shqyrtimin e ankesës.
Në lidhje me shitjen e aksioneve të Vllaznisë, Bashkia Shkodër hapi një tender ose garë publike, që ishte parashikuar të mbyllej në 9 mars. Tanimë, pas ankesës së dy biznesmenëve për shkelje dhe diskriminim, Komisioni i Ankandit Publik ka bllokuar çdo procedurë të mëtejshme deri në korrigjimin e dokumenteve, teksa nuk ka një datë fikse për këtë procedurë që do shpëtonte njëherë e përgjithmonë futbollin shkodran.
