E Shtuna e 13 marsit ka qenë një ditë zie për futbollin shijakas dhe atë shqiptar. Brenda pak orësh 4 figura të njohura kanë ndërruar jetë. Pas një sëmundje të rëndë, ka ndërruar jetë në moshën 95-vjeçare një personalitet i shquar i futbollit shqiptar, Sabri Peqini.
Ai u shpall 4 herë kampion me skuadrën e Dinamos, me të cilët luajti për 4 sezone, gjatë viteve 1950, teksa nga 1974 deri në 1976 ishte edhe si trajner i bluve.
Gjithashtu një tjetër humbje e madhe për futbollin pasi ditën e sotme është ndarja nga jeta e ish-futbollistit të Shijakut, Enver Drita.
Hysen Varosi, 82 vjeç. Si futbollist mbrojti portën e “Erzenit”, duke ia lënë stafetën Laknorit me shokë. Por ndërtoi historinë si gazetar i flaktë i “Erzenit”. Ai nuk do të harrohet kurrë këtu. Pasioni i tij nuk mund të konkurrohet. Lulzim Alia, 75 vjeç. Luajti futboll, por la gjurmë si trajner, duke mbetur deri në fund një figurë simpatike dhe e dashur për sportëdashësit shijakas.
Mbi këto ngjarje ka reaguar edhe presidenti i FSHF-së, Armand Duka, i cili me anë të një shkrimi të gjatë në rrjetet sociale ka shprehur ngushëllimet e tij me disa fjalë të ndjera.
Reagimi i Dukës:
Kjo e shtunë e 13 marsit na solli kaq shumë lajme të kobshme njëherësh në një koincidencë të trishtë. Katër ish-futbollistë të njohur Erzenit janë ndarë sot nga jeta, që të katërt personalitete të padiskutueshme, që kanë bërë histori e që do të mbahen mend gjatë nga sportdashësit shijakas.
Legjenda Sabri Peqini u nda sot nga jeta në moshën 94-vjeçare pas betejës me një sëmundje të rëndë. Ai e nisi karrierën e tij me klubin e Erzenit për t’i ngjitur shkallët e suksesit me shpejtësi e për t’u shpallur më pas disa herë kampion me Dinamon e viteve ‘50. Gjithashtu, Peqini luajti edhe me Kombëtaren shqiptare e më vonë do jepte kontributin e tij si trajner. Një figurë e padiskutueshme e futbollit shqiptar e një mik i mirë, që do të na mungojë shumë të gjithëve!
Enver Drita, një tjetër ish-futbollist i Erzenit u largua nga kjo jetë në moshën 85-vjeçare, por sportdashësve shijakase u ka lënë kujtime e mbresa mjaft të bukura me paraqitjet e tij në fushë. Përveçse një futbollisti virtuoz, ai është pjesë e historisë edhe për faktin se është një nga lojtarët më “fair-play” të futbollit shqiptar. Enveri ishte njeri që mbartte vetëm energji pozitive dhe një sportist model në fushë e jashtë saj.
Jo më pak i rëndësishëm për Erzenin ka qenë edhe Hysen Varosi, i cili u largua nga kjo jetë po sot në moshën 82-vjeçare. Ish-portieri, pjesë e një brezi të veçantë e që më pas do të vazhdonte karrierën si komentator e gazetar sportiv, por gjithnjë duke dhënë kontributin e tij plot pasion për sportin në Shijak. I katërti që u nda sot nga jeta ishte Lulzim Alia në moshën 75-vjeçare. Ai luajti për shumë vite futboll me Erzenin, por la më shumë gjurmë si trajner, duke u shndërruar në një personalitet mjaft të dashur për sportdashësit shijakas. Alia ka drejtuar ekipin e futbollit Erzeni për vite me radhë, duke nxjerrë breza të tërë futbollistësh.
Përveçse një humbje për futbollin shqiptar dhe atij shijakas, është edhe një humbje personale, sepse ata ishin të katër miq të familjes time.
