Kryeministri Edi Rama u shpreh mbrëmjen e sotme në emisionin Real Story se nuk i interesojnë aspak ato që thuhen për Rrahman Rrahjen, Jyrgis Çyrben dhe Ilir Ndraxhin.
“A keni fakte për ta, nuk merrem une me llafe që bëjnë mediat”, tha Rama.
Të tre deputetët janë konfirmuar edhe në listat e kandidatëve për zgjedhjet e 25 prillit në Qarkun e Durrësit.
Rama tha se përballë kemi një aleancë fosilesh, ndërsa ne jemi në lartësinë e duhur. Të tre deputetët nga raportimet e ndryshme rezultojnë të përfshirë në përgjime apo hetime. Emri i Ndraxhit doli në dosjen 339, Çyrbja u kap në një tjetër përgjim lidhur me ish-Hotel Vollgën, ndërsa familjarë të Rrahjes janë përfshirë në veprimtari kriminale.
“Këta janë përfaqësues të këtyre komuniteteve dhe marrin vota. Se edhe Paulin Sterkaj nuk merr foltoren e Kuvendit dhe të mbajë atje fjalime, por ka vota në zonën e tij”, tha Rama. Ai u shpreh se askush nuk mundet të kriminalizojë komunitetet që përfaqësojnë Ndraxhi, Çyrbja dhe Rrahja.
Sipas tij, ambasada amerikane ka bërë shumë mirë që ka sjellë në vëmendje ligjin e dekriminalizimit, por këta deputetë s´kanë asnjë lidhje me të.
