Presidenti Ilir Meta, i ka bërë thirrje sot kryeministrit Rama, të kërkojë ndjesë publike për fyerjet ndaj ish-deputetes së PD, Grida Duma.
Meta shprehet se e dënon me ashpërsi dhunën verbale dhe linçimin publik e të papranueshëm për traditën shqiptare, të bërë ndaj Dumës, njëherazi nënë e një fëmije të mitur.
Kreu i shtetit thekson se asnjë ndarje politike, s’mund t’i japë të drejtë revanshit të rrugaçërisë, për më tepër këto sulme të papranueshme për moralin njerëzor dhe etikën institucionale.
Statusi i Metës
E dënoj me ashpërsi dhunën verbale dhe linçimin publik, të papranueshëm për traditën shqiptare dhe çdo shoqëri demokratike, të bërë ndaj zonjës, njëherazi nënë e një fëmije të mitur, Grida Duma.
Asnjë ndarje politike nuk mund t’i japë të drejtë revanshit të rrugaçërisë, për më tepër kur këto sulme të papranueshme për moralin njerëzor dhe etikën institucionale, konsumohen nga personat e veshur me autoritetin e shtetit.
Duke besuar në reagimin e fuqishëm të shoqatave që angazhohen për mbrojtjen e të drejtave të grave, i bëj thirrje Kryeministrit ende në detyrë, të kërkojë ndjesë publike dhe të tërheqë mbrapsht sulmin dhe fjalorin ordiner të përdorur ndaj zonjës Duma.
