Presidenti i Republikës, Ilir Meta është shprehur i qartë se marrëveshje politike mes tij dhe kryeministrit Edi Rama nuk ka për të pasur asnjëherë. I ftuar në emisionin “Të Paekspozuarit”, me Ylli Rakipin, Kreu i Shtetit u shpreh se si President i vendit është i detyruar të bashkëpunojë vetëm për çështje të caktuara politike me Kryeministrin.
“Ky përmbysi marrëveshjen e 5 qershorit në mënyrë të njëanshme sepse kishte hall se si t’i krijonte këtyre një koalicion. Për të mirën e opozitës… (qesh).
Nëse ky diversion funksionon, nuk funksionon vetëm për meritë të Ramës, por edhe për paaftësi dhe paqartësi të opozitës, e cila duhet të jetë shumë e qartë për gjëra kaq të rëndësishme për vendin dhe për integritetin e saj, që të mos lërë hapësirë për spekulime. Kjo është një çështje e tyre.
Nga ana ime e kam bërë të qartë që marrëveshje politike mes Ilir Metës dhe Edi Ramës nuk ka për të pasur asnjëherë. Si President jam i detyruar të bashkëpunoj për çështje të caktuara, por për të tjerat nuk ua imponoj dot sepse nuk është në tagrin tim” – tha Meta.
