Kategoria e Parë/ Dinamo dorëzon kreun, Egnatia nuk ndalet në Grupin B. Rezultatet e plota!

Dinamo lëshon kreun në grupin A, kurse Egantia nuk di të ndalet në grupin B. Blutë e kryeqytetit u mposhtën nga Vora në minutat e fundit, pasi Tavani ndëshkoi portierin Bakaj. Kështu Burreli ruan vendin e parë, edhe pse ishte pushim këtë javë.

Fitore shprese për Veleçikun, që me një penallti mposhti Orikun dhe mbetet në garë për të qëndruar në Kategorinë e Parë. Në grupin B kishte fitore të thella, duke nisur me Egnatian që likuidoi Turbinën me rezultatin 4-1.

Magani me dygolëshin e tij, si dhe Shtubina e Shyti zhvlerësuan golin e Jaupajt. Me katër gola, 4-0, fitoi edhe Tomori kundër Flamurtarit. Mikel Canka e gjeti dy herë rrugën e rrjetës, ndërsa në listën e shënuesve e regjistruan emrin edhe Pepa e Oshafi.

Beratasit u ngjitën në vendin e dytë, kurse Pogradeci parakaloi Besën. Liqenorët fituan në transfertë 1-2 kundër Elbasanit, që nuk ka marrë asnjë pikë deri më tani. Dragoi e Dushaj shënuan për miqtë. Sot u luajtën edhe dy ndeshje të Kategorisë së Dytë. Sopoti mposhti 7-0 Valbonën, kurse Gramshi 1-0 Mirditën.

Kategoria e Parë, java 14:

Grupi A

Vora-Dinamo 1-0

Veleçiku-Oriku 1-0

Grupi B

Elbasani-Pogradeci 1-2

Tomori-Flamurtari 4-0

Egnatia-Turbina 4-1