Sot, në zyrat e “Lëvizjes VETËVENDOSJE” në Tiranë, kandidati për deputet Boiken Abazi dhe shumë aktivistë të tjerë, mirëpritën kryeministrin e Kosovës dhe kryetarin e Lëvizjes Albin Kurtin.
Me këtë rast ata mbajtën një konferencë për media, ku Kurti pohoi edhe një herë mbështetjen e tij për kandidatët nga zgjedhësit, Boiken Abazin për Qarkun e Tiranës, Iliaz Shehun në Qarkun e Lezhës, dhe Kreshnik Merxhanin në Qarkun e Gjirokastrës.
Boiken Abazi e uroi Albin Kurtin për fitoren e paprecedent në zgjedhjet e fundit në Kosovë, dhe e falënderoi atë për mbështetjen. “Aktivistët nga Shqipëria kanë kontribuar për vite me radhë që ndryshimi në Kosovë të ndodhë, e tash është koha që edhe aktivistët nga Kosova të ndihmojnë që ndryshimi të nisë edhe në Shqipëri”, tha Abazi.
Ai parashtroi para gazetarëve prioritetet e tij si deputet, e ato do të jenë beteja parlamentare e qytetare për drejtësi dhe kundër varfërisë. Po ashtu, ai nënvizoi edhe shqetësimin e madh e aktual të të gjithë qytetarëve, për pandeminë dhe administrimin e shëndetësisë publike në kushtet e krizës shëndetësore. “Shqipëria në shekullin XXI, tha Boiken Abazi, nuk meriton të vazhdojë të qeveriset nga pushtetarë të papërgatitur e të korruptuar”.
Albin Kurti e nisi fjalën e vet duke shprehur interesin e tij për ndryshim, në të mirë të qytetarëve dhe të popullit të Shqipërisë. “Shqiptarët kanë luftuar përgjatë historisë së tyre për çlirim prej armiqve e pushtuesve, por tash, është momenti për t’u çliruar nga padrejtësia, abuzimi dhe paaftësia”, theksoi Kurti.
Ai dha mbështetje të parezervë për Boiken Abazin, duke treguar se, përgjatë 15 viteve që njihet me të, ka krijuar sigurinë se Boikeni as nuk shitet e as nuk blihet, e se do të jetë përfaqësues i denjë i qytetarëve të Qarkut të Tiranës në Kuvendin e Shqipërisë.
“Deputetët e mbështetur nga Lëvizja VETËVENDOSJE!, Kreshnik Merxhani, Iliaz Shehu dhe Boiken Abazi, do të jenë zëri i të vërtetës në Kuvendin e Shqipërisë, e qytetarët e pakënaqur të Shqipërisë, të cilët e duan ndryshimin, janë shpresa e këtij vendi”, tha Kurti.
