Partitë apo koaliconet e regjistruara tashmë në KQZ për zgjedhjet e 25 prillit kanë afat deri në 8 mars për të dorëzuar listat e kandidatëve për deputet.
Mediat po publikojnë lista paraprake kandidatësh, të cilët mund të jenë edhe në listën përfundimtare, megjithëse procesi konsiderohet hermetik dhe mungojnë innformacionet zyrtare.
Demokratët e drejtuar nga Lulzim Basha kanë përmbyllur marrëveshjet me partitë aleate, janë regjistruar si koalicion në KQZ, ndërsa diskutimet janë teknike, pra mbi renditjen e kandidatëve të propozuar nga partitë e vogla në listën e kandidatëve për deputet.
Nga ajo që është mësuar deri më tani, palët janë dakordësuar që 3 drejtues të partive aleate të PD, Shpëtim Idrizi (PDIU), Fatmir Mediu (PR) dhe Dashamir Shehi (LZHK) të jenë të renditur në atë që quhet si lista fituese. Ndoshta Idrizi mund të kandidojë në Fier mes 3 emrave të parë në listën e kandidatëve, ndërsa Mediu dhe Shehi në Tiranë.
Ndërkohë që Agron Duka i PAA dhe Nard Ndoka i PDK do të jenë të pozicionuar në pjesën fituese të listës në qarqet Durrës dhe Shkodër.
Nga raportimet mësohet se lista e demokratëve në Tiranë do të kryesohet nga Lulzim Basha, ndërsa në të do të jenë të përfshirë edhe ish-Kryeministri Sali Berisha, si dhe drejtuesit politik në këtë qark, Albana Vokshi, Jorida Tabaku, Grida Duma, Belind Këlliçi, Flamur Noka, Alfred Rrushaj, Aldo Bumçi dhe Agron Shehaj.
Në Elbasan, lista do të kryesohet nga Gazment Bardhi, i cili është edhe drejtues politik për këtë qark, ndërsa e dyta pritet të jetë Oriola Pampuri. Gjithashtu pjesë e listës fituese të Elbasanit pritet të jetë edhe ish-deputeti Endri Hasa.
Në Durrës, lista kryesohet nga Edi Paloka, nënkryetar dhe drejtues politik i Qarkut nga rradhët e demokratëve. I dyti në listë pritet të jetë Agron Duka, kryetar i PAA, ndërsa e treta pritet të jetë një Floriana Garo, të paktën sipas raportimeve të deritanishme. Lista më pas vijon me Oerd Bylykbashin.
Në qarkun e Shkodrës, lista do të kryesohet nga drejtuesi politik i PD-së Helidon Bushati ndërsa do të pasohet nga Bardh Spahija, Greta Bardeli, Benardeta Syku, Zef Hila dhe Izmira Ulqinaku.
Në Dibër, krahas Xhelal Mziut, i cili është edhe drejtues politik i Qarkut, do të përfshihet në listën fituese edhe Sali Shehu si përfaqësues i FRD. Gjithashtu në këtë qark pritet të rikandidojë Dhurata Çupi.
Në Vlorë, lista pritet të kryesohet nga Bujar Leskaj, i caktuar si drejtues politik, ndërsa është menduar që atje të garojë edhe Ina Zhupa dhe Vangjel Dule, si kryetar i PBDNJ.
Lista e qarkut të Korçës do të kryesohet nga drejtuesi politik Edmond Spaho, ndërsa i dyti renditet Ervin Salianji.
Në Fier dhe Berat listat e kandidatëve do të kryesohen nga drejtuesit politikë, përkatësisht Enkelejd Alibeaj dhe Tomor Alizoti.
Ndërkohë, shumë prej emrave aktivë në rradhët e demokratëve, të cilët mbajnë pozicione në Sekretariatin e PD, si Çlirim Gjata, Ivi Kaso, Dorian Teliti, pritet të jenë pjesë e asaj që konsiderohet si lista fituese. Pjesë e listës së kandidatëve pritet të jetë edhe komediani Julian Deda, por edhe disa figura të tjera të shoqërisë civile, kryesisht të angazhuar në protestat në mbrojtje të Teatrit Kombëtar.
