Mësuesit do të vaksinohen kundër Covid-19 , me vaksinën britanike AstraZeneca, në institucionet ku punojnë.
Ministrja e Shëndetësisë, Ogerta Manastirliu, deklaroi nga qendra e vaksinimit në Durrës se ndryshe nga grupet e bluzave të bardha apo të moshuarve mbi 80 vjeç, mësuesit do të imunizohen nga virusi në ambientet e shkollave.
Manastirliu gjithashtu shtoi se vaksinimi i mjekëve dhe infermierëve është drejt përfundimit, me përjashtim të disa prej tyre që punojnë në poliklinika.
“Do të vijojmë me vaksinimet në të gjitha qendrat. Po përfundojmë me stafin mjekësor. Durrësi e ka përfunduar. Kanë mbetur edhe disa mjekë dhe infermierë në poliklinika. Vazhdojmë me fashën +80 dhe +90.
Me ardhjen e vaksinave AstraZeneca do të bëhet vaksinimi i mësuesve në shkolla. Jemi duke përzgjedhur infermierët që vazhdojnë trajnimin. Mbarojnë brenda 15 Marsit. Në tërësi janë më shumë se 11 mijë mjekë dhe infermierë që e kanë kryer deri tani vaksinën”, – tha ministrja Manastirliu.
