Gjatë konferencës së sotme për shtyp kryeministri Edi Rama është pyetur nga gazetarët nëse do të votojnë ose si do të veprohet me personat e infektuar me koronavirus më 25 prill.
Rama tha se do të veprojnë si të gjitha vendet e tjera dhe se personat që rezultojnë pozitiv me virus do të qëndrojnë në shtëpi dhe nuk do të votojnë.
Ndërsa, në zgjedhjet e zhvilluara në Kosovë një muaj më parë, votuan ata që ishin në shtëpi të izoluar, gjithashtu edhe pacientëve që qëndronin në spital u çuan kutitë e votimit, që të gjithë të kishin mundësi për të zgjedhur përfaqësuesit e tyre.
Kryeministri mohoi që dita e zgjedhjeve të ndikojë në rritjen e rasteve me koronavirus.
“Do bëjmë të njëjtën gjë që kanë bërë vendet e tjera. Për ata të cilët janë të testuar pozitiv dhe nuk janë negativizuar duhet të qëndrojnë në shtëpi.
E kemi parë këtë, është i vërtetë shqetësim dhe kjo është gjëja që kanë bërë vendet e tjera. Janë të parët njerëzit që duhet të marrin përgjegjësinë për këtë.
Nuk ka pasur për fat të mirë të dhëna shqetësuese postelektorale në aspektin e influencës së shëndetit. Nuk ka pasur rritje të numrit të infektimeve. Këtë e kemi parë me shumë kujdes” – tha Rama.
Me bazën ligjore aktuale të zgjedhjeve, të prekurit me koronavirus në vendin tonë, që duhet të qendrojnë të izoluar në banesë, nuk mund të votojnë. Për t’i hapur rrugën votimit të të infektuarve me koronavirus, duhen ndërmarrë ndryshime ligjore në Kuvend.
