Nga aparati i tij ka “përjetuar” ndeshjet e futbollit dhe sidomos ato të Partizanit… Shkrepje lumturie, shkrepje hidhërimi, shkrepje goli, por edhe shkrepje penalltie apo polemikash!
Puna e tij ishte në fushën e blertë, por nga sot nuk do të jetë më… Luigj Preçi, fotografi i përjetshëm i Partizanit, është ndarë nga jeta. i njohur si një tifoz i “demave”, Preçi ishte kudo që luante skuadra kryeqytetase dhe fiksonte momentet më të bukura me aparatin e tij.
Ai ishte infektuar me COVID-19 dhe betejën më të rëndësishme e ka humbur. Lajmin e ka dhënë gazetari Isuf Myrtaj, në rrjetet sociale.
“Ndahet nga jeta fotoreporteri i njohur sportiv Luigj Preçi. Një humbje e madhe për familjen, të afërmit, dhe komunitetin sportiv. Luigji ose ‘Daja im’, ndërroi jetë prej famëkeqit COVID-19.
Banonte në Tiranë dhe sipas pjesëtarëve të familjes, ceremonia për në banesën e fundit, do kryhet nesër 2 mars në Fushë -Kuqe të Kurbinit. Ngushëllime familjes, Lamtumirë daja i madh…të lehtë dheun”, shkruan Myrtaj. /Telesport
