Situata te Vllaznia nuk është më ajo e fillimit të sezonit teksa skuadra po shkëlqente në fushën e lojës dhe për pasojë harmonia në skuadër ishte në nivelin më të lartë. Shkodranët kanë lëshuar terren ndaj kundërshtarëve dhe humbja 1-2 me Tiranën në “Loro Boriçi” ka ndezur gjakrat në kampin kuqeblu.
Së fundmi, ashtu siç raporton Panorama Sport” ,sulmuesi Da Silva dhe portieri malazez Zogovic janë përplasur mes tyre, me sherrin që ka degjeneruar në dhomat e zhveshjes. Nëse nuk do ishte ndërhyrja e stafit teknik, lojtarët e kuqebluve do përfundonin deri te grushtet mes tyre.
Shkak është bërë goli i barazimit nga Batha në pjesën e parë. Sipas shtypit të shkruar, sulmuesi i ka kërkuar llogari portierit për mosreagimin në atë goditje dënimi, ndërsa ky i fundit tregoi se muri i vendosur prej tij u ça.
Në momentin e golit, Da Silva dhe Zogovic kanë shkëmbyer fjalë, me malazezin që nuk e ka pëlqyer aspak këtë situatë. Ai e ka pritur sulmuesin dhe shokun e skuadrës në tunelin e stadiumit, me tensionin që është rritur në maksimum. Ndërhyrja e stafit ka bërë që sherri mos degjeneronte në përplasje fizike. Rezultatet e fundit kanë bërë që te Vllaznia të trazohen ujërat.
