Antikushtetues, e ka cilësuar kreu demokrat Lulzim Basha, ligjin e Qeverisë Rama mbi shpronësimet. Basha ka prezantuar programin e PD mbi pronat, ndërsa theksoi se PD i është drejtuar Gjykatës Kushtetuese lidhur me këtë ligj dhe do të ndjekë rrugën e saj.
Basha ka kërkuar një ndjesë lidhur me vonesat dhe problemet e krijuara me çështjet e pronave në Shqipëri, ndërsa shtoi se ligji Rama për shpronësimet u bë për motive korruptive.
“Duhet t’ju dalim zot deri në fund pronarëve dhe të përndjekurve”, tha Basha.
Kreu demokrat premtoi se Qeveria e dalë nga zgjedhjet e 25 prillit dhe e kryesuar nga PD, ndjesën për problemet e pazgjidhura dhe problemet e shtuara ta kthejmë në angazhime konkrete.
Sipas tij, prona ka rëndësi për paqen sociale dhe për një zgjim të ri kombëtar ekonomik të Shqipërisë.
“Vlera e parë është vlera e patjetërsueshme e pronës. Ne besojmë tek prona si themel i organizimit shoqëror. Ne besojmë tek familja, ne besojmë tek liria.Familja, prona dhe liria të lidhura të treja bashkë janë themeli i një shoqërie të shëndetshme”, tha Basha.
Ai u shpreh se prona dhe liria janë të lidhura ngushtë, ndërsa shtoi se programi i PD është hartuar në bashkëpunim të ngushtë me shoqatat e pronarëve.
Kreu demokrat u shpreh se do t´i jepet fund debatit të pa drejtë të gjatë dhe hipokrit mbi pronat, ndërsa premtoi abrogimin e ligjit aktual të pronave. Sipas tij, Qeveria e dalë nga zgjedhjet e 25 prillit do të hartojë kuadrin ligjor të konsoliduar që jep zgjidhje çështjes së trajtimit të pronësisë.
“Kuadri i ri ligjor do të reflektojë reflektimin e parimeve themelore të pronësisë. Kthimi i pronës, kompensimi fizik, obligacione në fondet e investimeve publike. Garantimi dhe respektimi i titujve të pronësisë referuar një vendimi të formës së prerë administrative apo gjyqësor”, shtoi Basha.
