Mjeku dhe njëherësh CEO i rrjetit të Laboratorëve Intermedica, Vasil Llajo, i ftuar në emisionin “Hipokarti”, ka treguar ndryshimet që ndodhin në trup pas infektimit me COVID.
Ai u shpreh se pas infeksionit, në ditën e 7 apo të 8, vihen re ndryshimet në mushkëri, por duke theksuar se ky virus prek edhe organet e tjera si veshkat, zemrën apo trurin.
Ai sqaron se një person duhet të bëjë tamponin që pasi sheh simptomat e para, por duke shtuar se nuk është e nevojshme që të bësh direkt analiza, në rast se ke vetëm disa simptoma të lehta.
Sipas tij, një person me COVID duhet të bëjë analizat përkatëse në momentin që simptomat agravohen, apo kur fillon kolla.
“Pas infeksionit fillojnë edhe ndryshimet në mushkëri, që nuk vihen re në ditët e para të prekjes, por pas ditës së 7 apo të 8. Është fenomeni i hiperinfamacionin, ku organizmat e krijuara për të luftuar infeksionin, dëmtojnë vetë organizimin më pas. Pamja e mushkërive nga COVID është tipike që çdo mjek e dallon fare kollaj që është prekje nga ky virus. Ky virus prek disa organe, jo vetëm mushkëritë. Zemrën, veshkat, trurin dhe kjo është arsyeja që në momentin që të sëmurët shtrohen në spital, përdoren holluesit e gjakut sepse dëmtohet endoteli i arterieve. Pas infeksionit, një person duhet të kryej ekzaminimet kur shfaq simptomat e para, fillimisht për të parë nëse ka apo jo virusin në organizëm. Pra duhet bërë tamponi. Më pas personi duhet të hy në kontakt me një mjek që t’i japin udhëzime se si ai do të ndjekë vetveten. Duhet të kemi kujdes, pasi kur fillon agravohet sëmundja, apo kur fillojnë simptomat e para të kollës, duhen bërë të tjera analiza. Nuk ka arsye të bësh analiza vetëm sepse ke virusin në trup ke një temperaturë të lehtë apo dhimbje koke, nuk është e nevojshme të drejtohemi për të kryer analiza. Sipas prekjes së organeve të ndryshme, përcaktohen edhe llojet e analizave që duhet të kryhen”, tha mjeku.
