Partia Demokratike ka përmbyllur marrëveshjen me 14 parti që do të jenë pjesë e një koalicioni opozitar për zgjedhjet e 25 prillit, ndërsa LSI dhe PDS e Paskal Milos do të konkurojnë bashkë duke mbështetur njëra-tjetrën.
Në koalicionin e drejtuar nga Lulzim Basha, përveç 5 partive që ishin pjesë e asaj që njihet si opozita e bashkuar, janë përfshirë edhe subjekte të tjera, me synimin maksimalizimin e votave.
Kështu në koalicion ka hyrë Artur Roshi, një prej deputetëve të asaj që njihet si opozita e re. Roshi mori mandatin e deputetit pasi ligjëvënësit e opozitës së bashkuar në shkurt të 2019 dorëzuan bashkarisht mandatet e deputetëve.
Një tjetër surprizë ishte afrimi i FRD së Bamir Topit, i cili prej kohësh ka mbajtur një qëndrim kritik ndaj PD. Mësohet se Topi mund të jetë një nga kandidatët për deputetë në Tiranë, por jo në atë që konsiderohet si zona e sigurtë e listës, ndërsa për këtë parti është kërkuar garanci për një vend deputeti në Qarkun e Dibrës, ku me shumë gjasa për FRD do të kandidojë Sali Shehu. Mësohet se në rastin e Topit mund të përdoret formula e numrit të votave që ai mund të mbledhë dhe më pas të ketë një zhvendosje në listën e kandidatëve, bazuar kjo pikërisht te votat individuale.
Në koalicion përfshihet edhe Mendimi i Djathtë Liberal, një parti e cila ka mbështetje kryesisht në qarkun e Shkodrës, njëlloj sikundër edhe Kristian Demokratët.
Burime nga PD shprehen se negociatat me shumë prej subjekteve që janë shfaqur kritike ndaj PD janë zhvilluar prej kohësh duke ruajtur urat e komunikimit. Raportohet se qëllimi i krijimit të koalicionit me sa më shumë subjekte ka për qëllim mosfragmentaizimin e votës.
Negociatat me secilën parti do të vijojnë deri në 6 mars, kohë kur përfundon edhe afati ligjor për dorëzimin e listës së kandidatëve për deputet në KQZ. Këto negociata do të synojnë renditjen e emrave të propozuar nga subjektet në listën e kandidatëve, ku veçanërisht 5 parti do të synojnë që kryetarët t´i kenë të renditur në atë që quhet lista e sigurtë.
Partitë që do të marrin pjesë në koalicioni opozitar janë:
Partia Demokratike Lulzim Basha
Partia Republikane Fatmir Mediu
Partia Agrare Ambientaliste Agron Duka
Partia per Drejtesi Integrim dhe Unitet Shpëtim Idrizi
Lëvizja për Zhvillim Kombëtar Dashamir Shehi
Partia Demokristiane Nard Ndoka
Partia Fryma e Re Demokratike Bamir Topi
Partia e Ballit Kombëtar Artur Roshi
Partia Bashkimi per te Drejtat e Njeriut Vangjel Dule
Partia Bashkimi Liberal Demokrat Arian Starova
Partia Bashkimi Demokrat Ylber Valteri
Partia Mendimi i Djathtë Liberal Mustafa Lici
Partia Lëvizja e Legalitetit Shpëtim Axhami
Partia Kristian Demokrate Dhimitër Muslia
