Kryetari i KQZ, Ilirjan Celibashi në një konferencë për mediat ka dhënë detaje në lidhje me regjistrimin e koalicioneve zgjedhore për zgjedhjet e 25 prillit në vendin tonë.
Celibashi është shprehur se lista e zgjedhësve nuk ndryshon ajo është 3,584 milionë zgjedhës, mes të cilëve 902 mijë zgjedhës me karta apo pasaporta të skaduara.
Lidhur me votimin e atyre që mund të jenë të infektuar me koronavirus dhe duhet të karantinohen në banesa, Celibashi tha se KQZ nuk mund të afrojë asnjë zgjidhje në këtë rast, pra që ti shkojmë këtyre personave në banesa.
“Shpresoj që numri i zgjedhësve që mund të jenë të detyruar të qëndrojnë të karantinuar të jetë sa më i vogël, pasi ne si KQZ nuk mund të garantojmë që t´i çojmë në banesa kutitë e votimit. Duhet një ndryshim në kuadrin ligjor, por e shikoj të pamundur.
Në rastet kur personat janë në spitale apo qendra të organizuara, atëherë ligji parashikon ngritjen e qendrave të veçanta, por në rastet kur individët janë të karantinuar në banesa, ligji nuk parashikon asnjë zgjidhje, ata do mbeten pa votuar”, tha Celibashi.
