Partia Demokratike po tenton të krijojë një koalicion të gjerë, madje duke përfshirë edhe FRD e Bamir Topit.
Nga raportimet mediatike mësohet se zyrtarë të PD janë mandatuar për të zhvilluar bisedime me ish-Presidentin Bamir Topi, ndërsa nuk dihet nëse këto negociata do të japin ndonjë rezultat.
Kohë më parë emra që iu bashkuan partisë së ish-Presidentit u rikthyen në PD, si në rastin e Gazmend Oketës apo Aleksandër Biberajt, që duket se kanë shërbyer edhe si një urë lidhëse mes Bashës dhe Topit.
Mes Bashës dhe Topit nuk ka pasur kurrë një përplasje politike, pavarësisht se ish-Presidenti, dikur nënkryetar i PD, nuk i ka kursyer kritikat në drejtim të Partisë Demokratike dhe veçanërisht i ashpër ka qenë në akuzat ndaj ish-Kryeministrit Sali Berisha.
Ndërkohë, PD ka arritur marrëveshjen e koalicionit me aleatët e saj, PR, PDIU, PBDNJ, PAA, LZHK dhe PDK. Koalicioni i drejtuar nga PD do të quhet Shqipëria Fiton, ndërsa afati i fundit për regjistrimin në KQZ është dita e sotme.
Ndërsa, LSI në këto zgjedhje do të garojë si forcë e vetme politike, me listën e saj zgjedhore.
