Partia Republikane dhe ajo Demokratike kanë arritur marrëveshjen për t´u përfaqësuar në një koalicion të përbashkët në zgjedhjet e 25 prillit.
Kjo është konfirmuar nga kreu republikan Fatmir Mediu pas negociatave që zhvilloi sot me kreun demokrat, Lulzim Basha.
Mediu tha se marrëveshja është përmbyllur, ndërsa shtoi se teknikalitetet do të diskutohen më tej.
“Do të jemi në një koalicion, por teknikalitetet do të diskutohen”, tha Mediu. Në pjesën e teknikaliteteve përfshihen emrat e propozuar nga PR dhe që do të përfshihen në listën e kandidatëve të PD.
Mediu tha se për numrin e kandidatëve republikanë që do të përfshihen në listat e kandidatëve të PD sipas qarqeve diskutimet do të vijojnë deri në afatet ligjore të dorëzimit në KQZ të listës së kandidatëve për deputet.
Referuar raportimeve, Mediu ka kërkuar 3-4 kandidatë të propozuar nga PD në atë që konsiderohet si pjesa e sigurtë e listës, apo kandidatët fitues.
Ndërkohë po gjatë ditës së sotme, PD do të zyrtarizojë marrëveshjet edhe me PAA, LZHK, PDK, PDIU dhe PBDNJ.
