Hungaria bëhet vendi i parë i Bashkimit Europian që nis imunizimin e popullsisë me vaksinën kineze Sinofarm, pasi i dha dritën jeshile për përdorim në 29 janar. Vaksina nuk është aprovuar nga Agjencia Europiane e Barnave.
Autoritetet blenë 5 milionë doza të vaksinës, mjaftueshëm për të imunizuar 2.5 milion banorë në vendin me 10 milionë të tillë. Qeveria po përpiqet të frenojë me të gjitha mënyrat atë që e ka cilësuar si vala e tretë e pandemisë, përmes një dekreti u vendos që cdo vaksinë qe do të aplikohej tek të paktën 1 milion njerëz nëpër botë do të aprovohej në Hungari pa iu nënshtruar kontrolleve të rregullatorit të barnave në vend.
Zyrtarët hungarezë, përfshirë kryeministrin Viktor Orban, kanë qenë kritikë për programin e BE për vaksinimin, me pretendimin se fushata e ngadaltë e bllokut po i kushtonte jetë njerëzish.
“Nëse vaksinat nuk do të vijnë nga Brukseli ne do ti marrim diku tjetër’, pat thënë Orban muajin e kaluar.
Hungaria është gjithashtu vendi i parë i bllokut që i ka dhënë dritën jeshile Sputnikut rus, vaksinë e cila gjithashtu nuk ështe miratuar ende nga Agjencia Europiane e Barnave. Sipas ujdisë mes Budapestit dhe Moskës, Rusia pritet të dërgojë 2 milionë doza të vaksinës së saj, mjatueshëm për të imunizuar 1 milion njerëz.
