Kallëzohet në SPAK kryebashkiaku i Vorës

Një kallëzim në SPAK është depozituar këtë të Martë në SPAK nga LSI, ndaj kryetarit të bashkisë Vorë Gentian Picari si dhe disa drejtuesve në këtë bashki.

Koordinatori i LSI në Vorë, Vojo Bregu, pas depozitimit të kallëzimit tha se akuzat që janë ngritur janë korrupsioni aktiv për blerjen e votës dhe shpërdorimi i detyrës, në formën e grupit të strukturuar kriminal.

“Qëllimi kryesor i këtij grupi kriminal është tjetërsimi i votës së banorëve të bashkisë Vorë, dhe më konkretisht, me anë të falsifikimeve të formularëve, si dhe akteve të verifikimit si dhe ato të rivlerësimit  lidhur me dëmet e shkaktuara nga tërmeti, veprime  që nuk janë as më pak as më shumë se një tentativë e pastër për blerje vote,  me anë të dhënies së pronës publike me qera në kundërshtim me ligjin dhe me vendimet e KQZ, dhe së fundmi me ndryshimin e strukturës, që pavaresisht se është bashkia me borxhin në nivelin më të lartë në Shqipëri, rreth 226 përqind, ka shtuar rreth 70 punonjës, ndërmejet këtyre dhe persona me rekorde kriminale, me qëllimin e vetëm përdorimin e votës së tyre dhe familjarëve në zgjedhjet e 25 Prillit”, tha Bregu.

LEXO EDHE  986 të infektuar me koronavirus në 24 orët e fundit (Harta e të prekurve)

“Duke qenë se SPAK është një nga organet ligjzbatuese të dala nga reforma në drejtësi, unë jam i bindur se denoncimet tona si ky rast i sotëm, që janë të mbeshtetur në prova dhe fakte konkrete, janë një mundesi më shumë për SPAK dhe gjithë organet e drejtësisë të dëshmojnë se janë në mbrojtje dhe shërbim të të gjithë qytetarëve shqiptarë dhe jo një armë në duart e mazhorancës, që qartazi me llojin dhe karakterin e denoncimeve të saj po tenton të përdorë SPAK dhe drejtësinë në përgjithësi për gjueti shtrigash dhe eliminim të kundërshtarëve politikë para zgjedhjeve, shtoi ai.