Nga BoldNews.al
Një nga skuadrat më të titulluara të Shqipërisë, Vllaznia e Shkodrës, kryeson Superligën prej shumë javësh. Financa të shëndosha, trajner i huaj, organizim klubi i mirë kanë sjellë rezultetet e para.
Fitore ndaj skuadrave kryeqytetase në fazën e parë, apo edhe ndaj rivalëve të Kukësit, Laçit apo Teutës, krijuan bindjen se shkodranët do e kishin të lehtë titullin këtë vit. Por, në 5 ndeshjet e fundit, ekipi i Vllaznisë ka marrë 1 fitore, 1 humbje dhe 3 barazime.
Një ecuri aspak pozitive, duke marrë në konsideratë se faza e parë ka qenë mbreslënëse, ku ndjekësit në disa raste shkuan në plot 12 pikë diferencë. Aktualisht, nisur nga renditja, Vllaznia kryeson me vetëm 4 pikë më shumë se Partizani, i cili më këtë fazë të dytë, nisur edhe nga merkatoja dimërore ka pasur një marsh më shumë se shkodranët.
Por, në futbollin shqiptar ndikojnë edhe lëvizjet më të vogla. Një lojtar i lënduar, një i larguar apo vonesat e rrogave.
Në rastin e shkodranëve, problemet mund të jenë të lidhura me të ardhmen! Sipas dokumenteve që disponon BoldNews, Bashkia e Shkodrës ka hapur ankandin publik për shitjen e 100 % të kuotave të ekipit.
Sipas këtyre dokumenteve, në datën 9 mars 2021, Bashkia e Shkodrës do të hapë ankandin për shitjen me procedurë ankandi aksionet e Klubit të Futbollit “VLLAZNIA” sh.a, në masën 100%. “Klubi i futbollit Vllaznia sh.a, është shoqëri e organizuar në formën e shoqërisë aksionare, e krijuar në vitin 2011, ku aksionet zotërohen 100% nga Bashkia Shkodër”, thuhet në këto dokumente. Sipas tyre, vlera fillestare e shitjes është 50,794,000 lekë, ndërsa ankandi do të zhvillihet në godinën e Bashkisë së Shkodrës.
Nisur nga kjo procedurë, por edhe rezultatet e fundit, gjithkush mund ta lidhë formën në kampionat me ankandin që do të zhvillihet. Prej kohësh, administratori aktual, Alban Xhaferri, ka kërkuar pronësinë e Vllaznisë. Por, a do ta marrë më 9 mars? A kanë lidhje rezultatet aktuale me shitjen në ankand?!
