Kreu i PDIU, Shpëtim Idrizi, po zhvillon paraditen e sotme një takim me kreun demokrat, Lulzim Basha. Pavarësisht se dy partitë kanë gjetur dakordësinë lidhur me përfshirjen e tyre në një koalicion, me një listë të përbashkët kandidatësh për zgjedhjet e 25 prillit, duket se drejtuesit e tyre po qartësojnë pozicionet e emrave të propozuar nga PDIU në listën e kandidatëve.
Të mërkurën është afati i fundit për dorëzimin e listave të koalicioneve në KQZ dhe pritet që deri të martën, kreu demokrat të ketë marrë autorizimin e të gjitha partive aleate lidhur me renditjen e emrave të propozuar prej tyre në listën e kandidatëve.
Nga raportimet mësohet se është dakordësuar që Dashamir Shehi, Shpëtim Idrizi dhe Fatmir Mediu të jenë në atë që quhet si lista fituese në Tiranë. Nard Ndoka do të jetë në listën e Shkodrës, ndërsa Vangjel Dule në atë të Korçës.
Gjithashtu emrat e tjerë të propozuar nga PDIU dhe PR do të jenë të përfshirë në listat e demokratëve, por jo në atë që konsiderohet si listë fituese.
