Analisti Andi Bushati ka reaguar ashpër lidhur me procedimin penal të nisur nga Policia e Shtetit ndaj dy motrave që denoncuan publikisht mungesën e kujdesit shëndetësor ndaj babait të tyre në spitalin Infektiv, ku edhe humbi jetën.
Bushati shprehet se dërgimi në prokurori i dy vajzave që denoncuan dhënien shpirt të babait të tyre në spitalin infektiv, duke u dridhur së ftohti, të kujton kohët kur për “agjitacion e propagandë” përfundoje pas hekurave, vetëm se thoshe se vitrinat e mapo-s socialiste janë bosh.
Dy motrat denoncuan publikisht se babai i tyre ishte lënë në një karrige, pa mjekim, madje ai i kishte kërkuar që ta nxirrnin nga spitali. QSUT në një reagim u shpreh se pacienti që humbi jetën kishte shkuar në spital në gjendje të rëndë shëndetësore, i ishin bërë analizat dhe skaneri. Në anën tjetër dy vajzat që humbën babain kërkojnë dosjet e plotë mjekësore të babait të tyre.
