Fitorja e Partizanit ndaj Kastriotit brenda në Kamëz zgjati ecurinë pozitive të të kuqve në vitin 2021, duke e kthyer përsëri ekipin e Ilir Dajës në vendin e dytë të Kategorisë Superiore.
Suksesi ndaj Skënderbeut një ditë më parë e mbajti skuadrën e Teutës për vetëm 22 orë në këtë pozicion, pasi “demat” siguruan fitoren e tretë në katër ndeshjet e fundit jashtë fushe, falë një pjese të dytë vërtet shumë të mirë. Duke patur parasysh ngjeshjen e kalendarit si dhe duelin tepër të fortë me ekipin e Kukësit, trajneri Ilir Daja vendosi me shumë gjasa ta ruajë Jasir Asanin, pikërisht për takimin e afërt me verilindorët dhe 25-vjecari nga Shkupi e nisi takimin nga stoli.
Pas golit në derbi 54-vjecari kryeqytetas i ka dhënë besim të plotë Eraldo Cinarit, golashënuesit më të mirë të të kuqve në edicionin e kaluar dhe 24-vjecari shkodran ka mbajtur një peshë të rëndësishme në fazën sulmuese, duke i filluar si titullar tre sfidat e fundit me Vllazninë, Bylisin dhe Kastriotin.
Tre muaj e gjysmë më parë në duelin korrespondues të fazës së parë Partizani e pësoi në qytetin e Kamzës pas një goli të Ermir Rezit pikërisht në fund të takimit, ndërsa këtë herë gjërat u bënë akoma më të vështira për shkak të terrenit tepër të rënduar. Pjesa e parë ishte e ekuilibruar, ndonëse “demat” këmbëngulën gjatë në gjysmëfushën e Kastriotit. Ishte një ndeshje domethënëse për të kuqtë, që shtuan ndjeshëm përpjekjet në fraksionin e dytë të lojës, për ta nisur fazën e tretë të kampionatit shqiptar me fitore.
Eraldo Cinari dhe Stenio Junior ngulmuan gjatë për më shumë se një orë lojë dhe në fakt ishte pikërisht 29-vjecari brazilian që u tregua më i shpejti nga të gjithë, për të shtyrë për në rrjetë topin e mbetur në baltë, duke realizuar edhe golin e tij të parë në Kategorinë Superiore, sidoqoftë qetësinë e nevojshme ekipit më pas ia dha Jasir Asani, që shënoi një gol të shkëlqyer nga një goditje dënimi, ndërsa më pas furnizoi Lucas Cardoso-n në qendër, me një harkim perfekt nga krahu i djathtë, për ta mbyllur kështu takimin me një gol dhe një asist. Në këtë mënyrë 25-vjecari nga Shkupi u bë edhe golashënuesi më i mirë i skuadrës me 5 gola, 1 më shumë se Jurgen Bardhi, gjithsesi kurioz është fakti që 3 nga këto 5 gola Jasir Asani i ka realizuar pikërisht në portën e ekipit krutan, 2 prej tyre madje nga pika e bardhë e 11-metrave. Fitorja ishte detyrim dhe drejtuesit e klubit duhet të jenë tepër të lumtur me 3 pikët e radhës, ndërsa trajneri Ilir Daja duhet të ketë mbetur i kënaqur me pjesën e dytë dhe këmbënguljen e gjatë të të tijve në gjysmë oren e fundit për të fituar patjetër ndeshjen, për më tepër 54-vjecari i dha minuta në fund si dhe mundësinë për të debutuar edhe futbollistit të ardhur plot bujë, 30-vjecarit tetovar Ferhan Hasani.
Fusha e Kamzës mbetet ndër më të vështirat e Kategorisë Superiore, jo vetëm përsa i përket terrenit të rënduar por gjithashtu edhe për faktin që aty ia kanë dalë për të triumfuar vetëm skuadrat e Vllaznisë dhe Teutës, për më tepër klubi krutan po kalonte një moment pozitiv pas fitoreve radhazi ndaj Bylisit e Kukësit, pa harruar gjithashtu edhe faktin tjetër që ekipi i Ramadan Ndreut krenohej me plot 3 ndeshje pa pësuar asnjë gol. E pra demat shënuan 3 herë, po aq sa edhe kuqeblutë e Vllaznisë në vizitën e tyre dy muaj më herët, por tani me këto gola ekipi kryeqytetas konfirmohet edhe si sulmi më i mirë i këtij edicioni të kampionatit shqiptar.
Diferenca me Vllazninë vazhdon të mbetet 6 pikë dhe përpara në horizont shfaqen dy ndeshje tepër të vështira me rivalë të drejtpërdrejtë siç janë Kukësi dhe Laci. Partizani ka grumbulluar plot 15 pikë në 7 ndeshjet e para të vitit 2021, vetëm ekipi i Shpëtim Duros ka mbledhur një pikë më shumë dhe të kuqtë përfaqësojnë skuadrën e vetme pa humbje në këtë vit të ri duke konfirmuar një përmirësim të dukshëm, sidoqoftë formacioni i Ilir Dajës do të bëj çmos për të vijuar serinë pozitive, me synimin për të ngushtuar akoma më shumë dhe sa më shpejt që të jetë e mundur diferencën me klubin shkodran./Supersport
