Legjislacioni për zbardhjen e aksionerëve të vërtetë të kompanive që operojnë në Shqipëri është finalizuar me një vendim të Këshillit të Ministrave për krijimin e Regjistrit të Pronarëve Përfitues.
Ai do të jetë nën administrimin e Qendrës Kombëtare të Biznesit, por te ai do të kenë akses disa prej organeve ligjzbatuese më të rëndësishme në vend: Drejtoria e Përgjithshme e Parandalimit të Pastrimit të Parave; Banka e Shqipërisë; Drejtoria e Përgjithshme e Tatimeve; Autoriteti i Mbikëqyrjes Financiare; Drejtoria e Përgjithshme e Policisë së Shtetit; Prokuroria; Struktura e Posaçme Kundër Korrupsionit dhe Krimit të Organizuar (SPAK).
Të dhënat e regjistruara do të aksesohen në mënyrë të lirë, elektronike, direkte dhe të pakufizuar nga këto autoritete kompetente shtetërore, në funksion të përmbushjes së detyrave të tyre ligjore që lidhen me inspektimin e Regjistrit të Pronarëve Përfitues dhe mbledhjen e të dhënave mbi pronarët përfitues.
Për këtë arsye, Vendimi i Qeverisë përcakton se çdo përdorues i sistemit në cilësinë e autoritetit kompetent shtetëror pajiset nga QKB-ja në bashkëpunim me Agjencinë Kombëtare të Shoqërisë së Informacionit (AKSHI) me emrin e përdoruesit dhe fjalëkalimin (username dhe password), për: a) leximin e të dhënave; b) ngarkimin e dokumenteve shoqëruese që provojnë të dhënat që duhet të përditësohen në regjistër, në rast se ato konstatojnë se të dhënat e regjistruara në Regjistrin e Pronarëve Përfitues nuk përputhen me të dhënat në posedim të tyre, në zbatim të detyrave të ngarkuara nga ligji./Scan/
