Endrit Braimllari, Sekretari i Përgjithshëm i LSI-së, është gjobitur nga policia për mosrespektim të masave anti-Covid.
Braimllari është ndëshkuar me gjobë 5.000.000 lekë, ndërsa administratorja e lokalit ku ish-deputeti zhvilloi një takim, sipas policisë me “grumbullim personash në kundërshtim me masat anti-Covid”, është gjobitur me 1.000.000 lekë.
“Shërbimet e Komisariatit të Policisë Maliq, pas konstatimit në rrjetet sociale se përfaqësuesi i një subjekti politik konkretisht shtetasi Endrit Braimllari kishte organizuar dhe zhvilluar në ambientet e një lokali në qytetin e Maliqit, një aktivitet duke krijuar grumbullime personash në kundërshtim me Aktin Normativ Nr. 3, datë 15.03.2020, Neni 3, pika 2, e kanë ndëshkuar me masën administrative 5.000.000 lekë. Gjithashtu është ndëshkuar me masë administrative 1.000.000 lekë, shtetasja Z.B., pasi lejoi zhvillimin e aktivitetit në ambientet e lokalit që ajo administron, duke shkelur Aktin Normativ”, njoftoi policia këtë të Enjte.
Dje, policia gjobiti Monika Kryemadhin, kryetaren e LSI, me të njëjtin argument.
