Ambasada gjermane në Tiranë është treguar e vëmendshme ndaj përmbytjeve katastrofike që kanë goditur zonën e Shkodrës prej një muaji, pasi ka investuar për parandalimin e tyre.
Një mesazh i është përcjellë qeverisë se pavarësisht se reshjet ekstreme nuk parandalohen, reagimi i autoriteteve në të katër shtetet ndërkufitare si dhe i popullsisë në zonën e Shkodrës mund të forcohet.
E ndërkohë që nga Qeveria dhe Kryeministri Edi Rama, thirrjet e Kryebashkiakes Voltana Ademi për shpalljen e gjendjes së emergjencës, nuk janë marrë parasysh, duket se Ambasada gjermane në Tiranë është e shqetësuar për gjendjen e krijuar.
Në shënimin e publikuar në Fb, kjo ambasadë vëren:
“Prej javësh, zona e Shkodrës është goditur nga reshje të shumta shiu, të cilat kanë çuar në përmbytje në shkallë të gjerë, duke shkaktuar dëme të mëdha për banorët.
Që nga viti 2012, Gjermania ka mbështetur përmes projektit të GIZ Albania për adaptimin ndaj ndryshimeve klimatike, mekanizmat e parashikimit në zonën e lumit Drin/Buna.
Nëpërmjet saj u përmirësua bashkëpunimi midis organeve përgjegjëse në Shqipëri, Mal të Zi, Kosovë dhe Maqedoninë e Veriut. Bashkëpunimi ndërkufitar është thelbësor për të zvogëluar rrezikun e përmbytjeve dhe për të bërë parashikime të sakta. Edhe pse kjo nuk parandalon reshjet ekstreme, reagimi i autoriteteve dhe popullsisë në zonën e Shkodrës mund të forcohet.”
