Kryeministri Edi Rama ka vijuar “shëtitjet” në qytete të ndryshme të Shqipërisë, i cili shoqërohet nga ministra, deputetë, kryebashkiakë e drejtora të ndryshëm.
I shoqëruar nga autokolona me makina luksoze, të gjitha të shtetit, këta zyrtarë kanë filluar prej javësh fushatën elektorale.
“Turi i Jugut” vijoi në qytetin e “gurtë”, Sarandën. Ndërtimet në kodër dhe afër detit, kryesisht gjatë viteve të fundit, e kanë shkatërruar këtë qytet. Gjatë 8 viteve të fundit, Rama ka pasur “lapsin dhe lopatën”, ku çdo urdhër prej tij zbatohej nga vartësit. Natyrisht, për interesa të oligarkëve apo njerëzve që qëndrojnë afër Rilindjes.
Dhe, këtyre urdhrave nuk mund ti shmangej as Saranda e bukur. Në një nga këto shëtitjet, peisazhi nuk i ka pëlqyer “piktorit” dhe ka urdhëruar që të shkatërrohen qindra shtëpi dhe dyqane pa leje.
Dëgjojeni pak me vëmendje bashkëbisedimin mes kryeministrit dhe deputetit Alket Hyseni. Rama i thotë se ndërtimet poshtë maternitetit të Sarandës duhet të prishen. “Janë legalizuar në kohën e PD-së” ia kthen Hyseni. “Duhen shpronësuar” i përgjigjet kryeministri.
Një debat “rruge”, ku me një të rënë të lapsit, do të lihen në qiell të hapur qindra qytetarë të thjeshtë. Natyrisht, ndërtimet në Sarandë janë bërë si në kohën e PD-së së parë, që i “mori me vete kusuret”, dhe në kohën e PS-së. Por, Hyseni harron një detaj; ai, dhe të besuarit e tij në Sarandë, janë në pushtet prej 8 vitesh.
Nëse kishin gabuar apo shkelur ligjin ata të PD-së, përse nuk i denoncuan? Ti fusnin në burg?! Pasi, vetë kreu i Partisë Socialiste të Sarandës, Ardian Kola, ka qenë gjatë këtyre 8 viteve drejtor i ALUIZNI-t dhe Kadastrës së Sarandës. Madje, në Kadastër ka punuar edhe bashkëshortja e tij. Përse nuk i zbuluan këto afera? Dhe, nëse ka, siç thotë Hyseni, a nuk mbajnë përgjegjësi këta zyrtarë të PS-së për shpërdorim detyre?
Rama dhe Hyseni harrojnë shumëçka në Sarandë. Mjafton që të shohësh ndërtimet pa leje në breg të detit, të pyesësh se kush janë pronarët dhe do të gjejnë abuzuesit e vërtetë. Kush i legalizoi, hipotekoi apo dha leje për të ndërtuar në ujë apo shkëmb?
Nëse pyesin se kush e shfrytëzon plazhin në Ksamil apo kush është favorizuar do të mësojnë se përfituesit janë pikërisht drejtorët e PS-së!
Madje, edhe kreu i PS-së së Sarandës, Ardian Kola, që u shkarkua si drejtor i Kadastrës disa muaj më parë për abuzime të rënda me detyrën. Por, i shpëtoi burgut…
