Vëllai i Pelivan Sinanrrapaj, i cili vdiq pasi u dhunua nga tre persona, të cilët u lanë të lirë nga gjykata paralajmëron për hakmarrje nëse drejtësia nuk vihet në vend.
Në një intervistë për News24, vëllai i viktimës thotë se do të hakmerren. Duke folur për ngjarjen, ai sqaron se vëllai i tij ka pasur një konflikt me një prej autorëve.
“Me Ferdinandin ka pasur një konflikt të mëparshëm. Janë debatuar në lokal, por për çfarë arsye nuk e di. Ky konflikt ka ndodhur rreth dy javë më parë mos gaboj. Nëse shteti nuk bën drejtësi ne do të hakmerremi. Unë në atë moment nuk kam qenë në Ballsh dhe kur jam kthyer pas dy ditësh vëllain e kam gjetur në spitalin e Traumës. Kishte goditje me shufra hekuri në kokë. Doktori më tha që kishte mbi 6 goditje. Dua të shikohen edhe kamerat e sigurisë”, tha vëllai i Pelivan Sinanrrapaj.
Autorët
Policia fill pas ngjarjes bëri ndalimin e tre shokëve të 57-vjeçarit, ndërkohë që gjykata mori dhe masën e sigurisë ndaj tyre. Gjykata ka vendosur të lërë në “Arrest shtëpiak” Festim Alimerkajn, 53 vjeç dhe Ferdinand Merën, 42 vjeç, ndërsa për Fitim Zekajn, 44 vjeç, që dyshohet se vuan nga probleme të shëndetit mendor, gjykata ka caktuar masën e sigurisë “Detyrim paraqitje”.
Por pas vdekjes së 57-vjeçarit Fatmir Sinanrrapaj, djali i tij, Pelivan Sinanrrapajt, ka hedhur poshtë variantin që babai i tij dhe të akuzuarit kanë qenë duke pirë. Ai tha për mediat se babai i tij doli për të blerë fruta nga shtëpia dhe se nuk kishte fare qëndrime politike, sa të fliste e të çonte situatën deri në dhunë fizike. Në një intervistë për mediat, Fatmiri tha se ia ka lënë në dorë Zotit që të marrë hak ndaj personave që e dhunuan, pasi vetë nuk ka fuqi të marrë hak për babanë. Ai shton gjithashtu se autorët e kanë prerë në besë, pasi fillimisht e kanë ulur në tavolinë e më pas e kanë qëlluar me shufra hekuri duke e dëmtuar atë rëndë.
“Quhem Fatmir Sinanrrapaj. Babai ka dalë të blejë disa fruta, fidanë, për të mbjellë në shtëpinë që kemi në Corrush të Mallakastrës. Babai im nuk ka pirë me këta, ka qenë esëll dhe ai nuk merrej kurrë me politikë. E kanë prerë në besë duke pirë ndonjë gotë, ku di unë. Kanë debatuar njëherë në lokal, më pas duke ardhur në shtëpi e kanë qëlluar me shufra hekuri 3 persona. Jo ata që ishin bashkë. Ferdinand Merkaj, Festimi dhe ai tjetri nuk pinin bashkë, e kanë vrarë në besë e kanë vrarë. Nuk kanë ngrënë e as kanë pirë bashkë”, ka thënë ai.
