Sergej Milinkovic-Savic është ylli i Lazio. Themelor për Simone Inzaghi, këtë sezon ai është rritur edhe më shumë. Mesfushori serb, zbulim i Igli Tares, konsiderohet lider i padiskutueshëm së bashku me tenorët e tjerë bardhekaltër, pjesë e çmuar e “ansamblit” të Claudio Lotito. Padroni i klubit kryeqytetas gjithmonë ka ngritur një mur kur në “Formello” mbërritën disa oferta.
Në një moment të caktuar, “rreshteri” ishte kthyer në ar. Serbi vlen 100 milionë euro, një çmim për të trembur europianët e mëdhenj. Kontrata e tij zgjat deri në vitin 2024, situate e tij është e blinduar. Megjithatë, Sergej, siç pranoi në një intervistë për kanalin televiziv serb “Nova”, ka një ëndërr për të ardhmen: “Një ditë do të doja të luaja për Real Madridin”. Pra, një ëndërr e bardhë…
“Puna e vështirë na pret në Ligën e Kampionëve. Të them të drejtën, unë doja të luaja në Madrid kundër Realit për të ndërruar fanellat. Thënë kjo, mendoj se mund të kemi një ndeshje të shkëlqyeshme kundër Bayernit. Kam ëndërruar të luaj për Real Madridin që kur isha fëmijë. Ky është qëllimi im më i madh në karrierën time dhe do të bëj gjithçka për ta arritur atë”, – shton mesfushori.
Tani për tani është lojtar i Lazio, nuk ka ndërmend të largohet. Një ditë, kush e di. Çdo fëmijë që fillon futbollin ëndërron të veshë fanellën e Realit. Milinkoviç, gati 26 vjeç, mendon se ai moment do të vijë së shpejti. Por, së pari do të duhet të flaës me presidentin Lotito.
