Mund të duket e çuditshme, por Zelanda e Re është e mërzitur me fotot që turistët zgjedhin të postojnë në rrjetet sociale.
Vendi ka nisur një fushatë të re, ku agjencia e turizmit po u kërkon njerëzve që të mos kopjojnë fotot që ndikues të mediave sociale kanë hedhur në profilet e tyre në rrjetet sociale, por të gjejnë vende dhe poza të reja.
Thirrja u bë nëpërmjet një video të shkurtër, me protagonist aktorin e njohur komik, Tom Sainsbury. Ai ndjek turistët në disa prej peizazheve më të famshme të vendit dhe i nxit ata të mos bëjnë foto, nën ndikimin e rrjeteve sociale.
“Njerëzit i kanë parë ato fotografi në mediat sociale dhe po bëjnë shumë përpjekje për t’i kopjuar ato. Gjeni diçka të re”, thotë ai. Fushata vjen në një kohë të vështirë për turizmin, me shumicën e udhëtimeve ndërkombëtare të ndaluara.
