Pothuajse çdo javë raportohen lajme mbi kaosin e krijuar në Tiranë, ndërsa qarkullimi me automjet është kthyer në një problem më vete, që shkakton stres, por edhe e kthen kryeqytetin në një qytet të pabanueshëm.
Shkak i krijimit të këtij kaosi është ndërhyrja pa një plan nga ana e Bashkisë së Tiranës së drejtuar nga Erion Veliaj në disa nga akset rrugore, por edhe kompanitë që përzgjidhen për të kryer punimet.
Kjo jo vetëm në aspektin e cilësisë, por edhe mungesën e kapaciteteve për të zhvilluar punimet në afate kohore. Më konkretisht një prej kompanive që ka fituar tenderat nga Bashkia e Tiranës është “Almo shpk”, e cila po kryen punimet në një nga segmentet përgjatë zonës së njohur te Astiri.
Një nga akset më të rëndësishme në fluksin e qarkullimit të mjeteve, prej muajsh mbahet i bllokuar, duke shkaktuar kaos.
Bëhet fjalë për segmentin nga Kaza Italia te ish-karburanti i Kastratit, ku mund të harxhosh me orë të tëra në trafik për të përshkruar këtë rrugë.
Kompania ka nisur punimet prej gati 6 muajsh dhe vijon e njëjta situatë, ndërsa ata që paguajnë janë qytetarët, banorë ose jo të Tiranës, të cilëve i duhet të kalojnë në këtë segment.
Ndonëse kompanitë e ndërtimit apo ato të infrastrukturës nuk u penguan në zhvillimin e punës së tyre gjatë pandemisë, pra nuk patën orare kufizuese, duket se ato nuk kanë kapacitete për të përfunduar punimet që i nisin me tendera që ndoshta u “dhurohen” nga Bashkia e Veliajt.
Dikush duhet të mbajë përgjegjësi, aq më shumë kur bëhet fjalë për orë të tëra që çdo ditë u vidhen qytetarëve nga koha e tyre, pa përmendur këtu shpërdorimin që u bëhet taksave që u mblidhen për infrastrukturën.
Fotot e mëposhtme tregojnë atë që ndodh në segmentin rrugor, pamje që përsëriten çdo orë të çdo dite dhe askush nuk e vë ujin në zjarr.
