SHKUP – Varianti britanik i pandemisë Sars-Cov2 ka qenë i pranishëm në Maqedoninë e Veriut që në muajin dhjetor.
Një fakt i tillë është vërtetuar nga Instituti i Shëndetit publik, ku në laboratorin e virusologjisë prej 48 mostrave të marra në shqyrtim, 5 kanë pasur gjurmë të mutacionit të ri me origjinë nga Britania e Madhe.
Sipas ISHP-së 4 pacientë nga Kavadari dhe 1 nga Kumanova kanë qenë të infektuar nga varianti i ri ende pa e ditur se i njëjti është prezent në Maqedoni.
Por, këto nuk janë të vetmet në vend, pasi edhe në Laboratorin e Akademisë së Shkencave, gjatë sekuencionimit është evidentuar rasti i parë gjatë muajit janar.
Si pasojë e transmisionit 70% më të shpejtë të virusit, përkohësisht u karantinua edhe Klinika e Nefrologjisë ku rezultuan të infektuar dhjetëra pacientë dhe personel mjekësor.
Në 24 orët e fundit në Maqedoninë e Veriut janë kryer 2107 teste, ku kanë rezultuar pozitivë 373 persona, 7 qytetarë kanë humbur jetën, ndërkohë që 638 pacientë janë shëruar.
