Ulen pagat e zjarrfikësve. Punonjësit e këtij shërbimi në Tiranë, kanë marrë në dhjetor 5 mijë lekë të reja më pak. Kurse ata në qytete të tjera kanë disa muaj që u është ulur. Po nuk është ky i vetmi penalizim nga qeveria.
“Në total, një punonjësi zjarrfikës në xhep i mungojnë 200 mijë lekë, duke llogaritur ditën e shtunë e të dielë, orët e natës, ditët e festave.
VKM 203 që bie ndesh me kodin e punës, ku thuhet që një zjarrfikës nuk mund të paguhet ditë të shtunë e të dielë, ditë feste i ka ditë normale pune. Ndërkohë që një zjarrfikës gjatë gjithë vitit është në gatishmëri”, sqaron Bledar Bajrami.
Bledar Bajrami, kreu i sindikatës, deklaron se nuk po zbatohet vendimi i ri i qeverisë, i marrë më 10 Prill të 2019-ës. Ai parashikon rritje të shpërblimeve.
Në ligj thuhet se do të përfitojnë 25% për çdo orë pune shtesë, 50% për çdo orë pune gjatë pushimit javor. Një tjetër rritje është edhe puna gjatë festave zyrtare. Në këto ditë, sanksionon 25% për çdo orë pune. Gjithashtu, për shërbimet e kryera gjatë orëve të natës parashikohet 50 %.
Pavarësisht këtyre rritjeve, ky vendim nuk është zbatuar. Në pagën e dhjetorit të punonjësve të zjarrfikësve të Tiranës nuk është reflektuar asnjë nga këto vendime.
Zyrtarisht, ministria e brendshme sqaron për “ABC” se vendimi nuk është zbatuar nga bashkia.
Kjo shkelje është konstatuar edhe nga Shërbimi për Çështjet e Brendshme dhe Ankesat, i cili i është drejtuar Bashkisë me një kërkesë zyrtare.
Por, sipas tyre, ngërçi në mosdhënien e plotë të pagës, ka ardhur pasi shefat e shërbimeve zjarrfikëse nuk kanë përpiluar kartelën për çdo orë shtesë që ka kryer një punonjës.
Bledar Bajrami, i cili punon edhe vetë si zjarrfikës në kryeqytet kërkon që të zbatohet në mënyrë rigoroze vendimi i Këshillit të Ministrave.
“Të paguhen orët e natës për zjarrfikësit sipas Kodit të Punës, sipas ligjit. Unë kam pasur telefonata dhe të gjithë zjarrfikësit janë gati të lënë edhe punën, janë gati të dalin edhe në protestë, nuk është koha, është pandemi”, shton më tej ai.
Vendimi më 10 prill 2019 për zjarrfikësit:
– 25 % për çdo orë pune/shërbimi shtesë në ditë të zakonshme pune;
– 50 % për çdo orë pune/shërbimi shtesë të kryer gjatë pushimit javor;
– 25% për çdo orë pune në ditët e festave zyrtare;
– 50% për çdo orë pune në ndërhyrje operacionale të kryer nga ora 22:00 deri në orën 06:00.
/abcnews.al/
