Trajneri i Juventusit, Andrea Pirlo, ka mbrojtur vendimin e tij për ta zëvendësuar Cristiano Ronaldon në fitoren e së martës ndaj Interit, pavarësisht se ylli portugez shënoi dy gola dhe shfaqi pakënaqësi kur doli nga fusha, në minutën e 77-të. Trajneri bardhezi tha se ndjeu nevojën për ta pushuar yllin e ekipit të tij, i cili mbush 36 vjeç të premten:
“Është normale që në një ndeshje si kjo të doni të luani, për ta ndihmuar ekipin. Nuk ka asnjë klauzolë kontrate që thotë se Ronaldo nuk mund të zëvendësohet. Ai e di se është një lojtar themelor për ne, por ka nevojë edhe të marrë disi frymë, që të jetë gjithmonë në majë.
Ai e vërtetoi karakterin dhe forcën që ka me paraqitjen që bëri sonte, pas disa kritikash. Cristiano nuk mund të kishte bërë më mirë se kaq. Unë i thashë se duhej të pushonte, pasi kemi një ndeshje të rëndësishme të shtunën. Ai ka luajtur shumë ndeshje radhazi. Herë pas here, pak pushim është i mirë për të”.
