Rektori i Universitetit të Tiranës, Artan Hoxha, firmosi dje vendimin e zhvillimit online të provimeve të semestrit të parë për studentët.
Megjithatë rektori e le të hapur mundësinë e zhvillimit në auditorë të disa prej provimeve.
Për këtë çështje, Agred Tafaj, drejtues i Lëvizjes Studentore u shpreh në Euronews Albania se vendimi i rektorit Hoxha është i nxituar.
“Ky vendim është pak i nxituar, pasi vetë Komiteti Teknik i Ekspertëve ka thënë që ne po presim që në bashkëpunim me ministrisë e Arsimit, të jemi në gjendje që të marrim një vendim, me qëllim që të hapen auditorët”, u shpreh ai.
Zoti Tafaj bëri edhe njëherë publike kërkesat aktuale të studentëve.
“Nuk duam leksione, pra nuk duam grumbullime të mëdha, ato që duam ne është mësimi në auditorë për seminare, praktika dhe laboratorë”, tha ai.
Ai tregoi se studentët i kanë dërguar edhe një peticion autoriteteve shtetërore për plotësimin e kërkesave të tyre.
“Peticioni fillimisht iu dërgua, kryeministrit, ministrisë së Shëndetësisë dhe ministrisë së Arsimit. Kërkesa ishte e qartë pra hapja e auditorëve për seminare, praktike dhe laboratorëve”, tha drejtuesi i Lëvizjes Studentore.
Zoti Tafaj tha më tej se gjatë takimit me kryetaren e Komitetit Teknik të Ekspertëve, Mira Rakacolli, kjo e fundit e la të hapur mundësinë për hapjen e auditorëve.
