Nga BoldNews.al
Fundi i vitit 2013 e gjeti kompaninë e ndërtimit “2T” në pozicionin e cironkës financiare, krahasuar me shoqëritë që kishin arritur të siguronin kontrata publike të rëndësishme.
Kompania e themeluar në vitin 2000 nga Artan Sako dhe Dritan Troksi kishte siguruar disa leje ndërtimi, që i kishin siguruar të ardhura për të mbajtur në aktivitet sipërmarrjen private.
Megjithatë, “2T” ishte thuajse e panjohur në kohën kur Edi Rama mori mandatin e tij të parë qeverisës, në Shtator 2013.
Prej asaj kohe, “2T” ka përparuar ndjeshëm, duke u shndërruar në një prej kompanive që siguron kontrata multi-milionëshe nga institucionet e drejtuar prej “Rilindjes”.
Ka nga ata që ia atribuojnë shëndoshjen financiare të “2T” faktit që kompania ka ndërtuar një godinë në pronësi të familjes së Linda Rama (Basha), në vitin 2012.
Megjithëse ky informacion nuk është konfirmuar me dokumenta zyrtarë, sërish lidhja e të paktën njërit prej pronarëve të “2T”, Artan Sako, me kryeministrin Edi Rama, është thuajse e konfirmuar.
Vëllai i Artan Sakos është Gramoz Sako, komandanti i Gardës së Republikës, i emëruar prej Ramës që në vitin 2013 dhe vijon ta mbajë ende këtë funksion edhe pas 7 vitesh.
“2T”, nga “cironkë” në “balenë” tenderash
“Boldneës.al” ka konsultuar të dhënat publike në portalin “spendingdata.a”, të specializuar për raportimin e transaksioneve të Thesarit të Shtetit.
Deri në vitin 2012, kur Edi Rama ishte në opozitë, kompania e ndërtimit “2T” kishte siguruar kontrata publike në një numër më të ulët se gishtat e njërës dorë.
Në Korrik të atij viti, “2T” u angazhua në ndërtimin e rrugës së komunës Kastrat, në Shkodër.
Po në vitin 2012, “2T” fitoi një kontratë minimale për mirëmbajtjen e digës së liqenit Balgjaj, për të cilën rezulton se është paguar rreth 40 mijë lekë të reja.
Por, në fund të vitit 2013, kur Edi Rama erdhi në pushtet, nisi të fryjë një erë e mirë për kompaninë “2T”, sa u përket përfitimit nga kontratat publike.
Në periudhën Tetor-Dhjetor 2013, kompania “2T” arriti të siguronte transaksione publike në një vlerë prej rreth 20 milionë lekë të reja.
Ky ishte një hap i vogël drejt kontratave më të fuqishme.
Në vitin 2014, gjithnjë sipas të dhënave të publikuara në “spendingdata.al”, institucionet publike arkëtojnë në llogaritë e kompanisë “2T” rreth 70 milionë lekë të reja.
Tashmë kompania në pronësi të Artan Sakos kishte nisur rrugëtimin e mbarë. Në periudhën pasuese, 2015-2018, institucionet qeveritare derdhin në llogaritë e “2T” plot 500 milionë lekë të reja.
Kompania e Sakos kishte arritur të fitonte disa kontrata me Autoritetin Rrugor Shqiptar, të cilat ishin një garanci e madhe se “2T” tashmë mund të rivalizonte edhe me grosistët e konsoliduar në treg.
Në vitet 2019-2020, kompania “2T” shënon kulmin e saj. Qeveria derdh në llogaritë e kompanisë plot 1.5 miliardë lekë të reja, ndërkohë që ky nuk është fundi.
Të dhënat e “spendingdata.al” i referohen vetëm transaksioneve të kryera, sipas situacioneve dhe pagesave periodike pjesore.
Ndërkohë që kompania “2T” vijon të marrë pagesa të tjera, për kontratat në vijim ose për ato të rejat.
Dhe, duke u ndalur tek kontratat e reja, emri i kompanisë “2T” gjendet shpesh në listën e fituesve të tenderave të zhvilluar së fundmi nga Autoriteti Rrugor Shqiptar dhe në projektet e rindërtimit, pas tërmetit të 26 Nëntorit 2019.
