Fillimisht ishte programuar që java e 18-të e Kategorisë Superiore të zhvillohej në datën 5 dhe 6 shkurt por së fundmi ka zhvillime të tjera.
Për shkak të dëmtimit të fushës në “Elbasan Arena” pas ndeshjes Partizani-Vllaznia, ky raund ndeshjesh do të spostohet në tre ditë. Fillimisht ishte menduar që ndeshja Kukësi-Kastrioti të luhej të premten prej orës 18:00 në Elbasan por tashmë është vendosur të luhet të dielën në Shkodër, prej orës 13:45.
Me ndryshimin e planit, java e 18-të e Superiores nis me përballjen kryesor të javës, Vllaznia-Laçi në “Loro Boriçi”. Luhet të premten, prej orës 18:00.
Të shtunën luhen tre përballje dhe një nga takimet më interesante zhvillohet në Ballsh, aty ku Bylisi pret Partizanin e vendit të dytë dhe kërkon pikë të arta për të mos rënë nga Superiorja.
Në kryeqytet,Tirana pret Skënderbeun, klub që renditet në fund dhe ka mbetur edhe pa trajner pas largimit të Julian Ahmatajt. Të dyja këto takime nisin në 13:45, ndërsa në orën 16:45 Teuta duhet të bëjë detyrën kundër Apolonisë në “Niko Dovana”.
Programi i rishikuar, Kategoria Superiore, java 18:
E premte, më 5 shkurt 2021
Ora 18:00, Vllaznia-Laçi
E shtunë, më 6 shkurt 2021
Ora 13:45, Bylisi-Partizani
Ora 13:45, Tirana-Skënderbeu
Ora 16:45, Teuta-Apolonia
E diel, më 7 shkurt 2021
Ora 13:45, Kukësi-Kastrioti
