Botohen në Fletoren Zyrtare vendimet e Kuvendit për mosmiratimin e kandidaturës së Besnik Mustafaj, Edmond Tullumanit dhe Helidon Halilit si anëtarë të Këshillit Drejtues të RTSH.
Të tre emrat ishin miratuar nga Komisioni Parlamentar i Medias gjatë kohës që PD ishte në Parlament, pra pa dorëzuar mandatet.
Dy nga propozimet ishin bërë në atë kohë nga PD, ndërsa i treti nga PS, dhe emrat kishin kaluar me konsensus.
Për pothuajse 3 vite, kandidaturat nuk kaluan për votim në seancat parlamentare, ndërsa javën e kaluar pr-vendimet u shfaqën në Parlament, ku edhe u rrëzuan.
Në fletroren zyrtare janë botuar 3 vendimet për mosmiratimin e 3 kandidaturave, që u futën në rendin e punimeve të Parlamentit nga mazhoranca e kryesuar nga Edi Rama, me qëllimin për të krijuar një përshtjellim.
Në shkurt të këtij viti mbushen plot dy vjet nga vendimi i opozitës së bashkuar për të djegur mandatet e deputetëve dhe në prag të zgjedhjeve të 25 prillit, duket se Edi Rama kishte nevojë për të krijuar një diversion, por edhe për të bërë pis figurën e Besnik Mustafaj, ish-deputet i PD, i cili ishte caktuar edhe një nga 5 anëtarët e Komisionit të Përzgjedhjes së kandidatëve për deputet mes rradhëve të demokratëve.
Në një reagim në rrjetet sociale, ish-deputetja Albana Vokshi, e cila drejtonte Komisionin e Medias, para djegies së mandateve nga opozita e bashkuar, shkruante se “në largim e sipër, Edi Rama po mundohet të bëjë atë që ka bërë pandërprerë gjatë gjithë pushtetit të tij 23 vjeçar, të marrë nën kontroll çdo institucion që mund të ushtrojë presion ndaj mediave dhe të përçajë opozitën”. Ajo sqaronte se vakancat e Këshillit Drejtues të Radio Televizionit Publik Shqiptat, Edi Rama i përdori në mënyrë diabolike për ta uzurpuar atë dhe për të kompromentuar figurën e z. Besnik Mustafaj.
“Loja e tij është mjerane. Lajmet e shpërndara nga zyra e propagandës së qeverisë kundër Besnik Mustafajt janë të rreme. Edi Rama vonoi qëllimshëm për 2 vjet kandidaturat e miratuara në unanimitet të plotë, në respekt të ligjit, në Komisionin e Medias, të cilin e drejtoja atëherë. Besnik Mustafaj dhe Edmond Tullumani u mbështetën nga PD, Heldon Halili u mbështet nga PS. Pasi e vonoi votimin 2 vjet, Edi Rama rrëzoi kandidaturat, në një akt të paprecedentë në historinë e parlamentarizmit.
Asnjëherë më parë, nuk ka ndodhur që kandidaturat e miratuara në unanimitet në komision, të rrëzohen nga seanca plenare. Kjo ndodh vetëm me një si Edi Rama që, në fund të pushtetit të tij, të kapë edhe Këshillin Drejtues të RTSH. i trembur nga vendimi i shqiptarëve në 25 prill, bën të tilla lojra të pista. Ky akt, është vula e fundit e Edi Ramës kundër lirisë së medias”, thuhej në reagimin e Vokshit.
