Nga BoldNews.al
Një nga lagjet më të ndotura në të gjithë Shqipërinë, Sheqi i Fierit, nuk do t’i shpëtojë plehrave. Çdokush që ka udhëtuar në Fier, sapo kalon urën mbi lumin Seman, ka ndjerë aromën e fortë të plehrave. Landfilli i improvizuar ka funksionuar prej shumë vitesh, megjjthë ankesat e banorëve dhe ambientalistëve. Krahas plehrave, në atë vendgrumbullim qëndrojnë edhe bagëti, lopë, dele, e madje edhe dërra. Hapja e inceneratorit në periferi të Fierit, gëzoi banorët e Sheqit, por jo të Verrisë, pasi plehrat nga Fieri do të shkonin ne fshatin e tyre.
Megjjthatë, gëzimi i banorëve të Sheqit ka zgjatur fare pak. Plehrat e qytetit do të vijojnë të shkojnë në Sheq! “BoldNews” ka siguruar dokumentet e një tenderi që po zhvillon Bashkia e Fierit, ku Armando Subashi u ka bërë një “dhuratë” këtyre banorëve. Në Sheq është parashikuar një stacion për selektimin e plehrave para se të shkojnë në incenerator.
Në atë vend, sipas dokumenteve, do të ndërtohet një magazinë selektimi. Objekti i tenderit në fjalë është “pika e gumbullimit të mbetjeve, Njësia Administrative Qender, fshati Sheq Fier”. Pra, është pikërisht në të njëjtin vend ku është landfilli. Edhe pse u investuan dhjetëra milionë euro për inceneratorin, sërish hyrja e qytetit do të jetë vendgrumbullim mbetjesh. Influenca e fortë e “mafies së plehrave” ka detyruar Subashin që t’u vijë në ndihmë, duke mos u bërë “pis” investimin në Verri.
Sipas dokumenteve që disponon “BoldNews”, fondi për këtë tender është rreth 200 mijë euro, ndërkohë që Subashi kërkon që objekti të ndertohet brenda 6 javëve. Mësohet se tenderi do të zhvillohet në datën 18 shkurt dhe kryetari i Bashkisë synon që me këtë “investim” t’u hedhë “hi syve” fierakëve para zgjedhjeve të 25 prillit, duke u justifikuar se e rrëgulloi landfillin.
Por, plehrat do të vijojnë të dërgohen në këtë vend dhe këtë se mohon dot as Subashi, pasi në dokumentet që vetë ka përpiluar shkruan se magazina do të ndërtohet pikërisht në Sheq.
Sipas dokumenteve të Bashkisë së Fierit, objekti që do të ndërtohet ka një sipërfaqe prej 800 m2, me përmasa 20x40m me lartësi 5m. “Ky objekt do të shërbejë si pikë grumbullimi për mbetjet urbane të qytetit të Fierit, të cilat më pas do të transportohen te inceneratori o ri. Objekti është projektuar nga konstruksion metalik dhe mbules me panel sanduiç” thuhet në dokumente. Sipas tyre, veshja anësore është parashikuar me llamarinë të valëzuar. Sheshi në brendësi të kapanonit është parashikuar me beton arme.
“Vendi i ngarkimit të mbetjeve është projektuar në kuotë më të ulët sesa sheshi objektit sipas paraqitjes së prerjes”, thuhet në këto dokumente.
Por, nuk përfundojnë këtu shpenzimet për plehrat e Fierit. Pasi shpenzoi miliona për rehabilitimin “sa për të thënë” të landfillit apo edhe për magazinën, Subashi do të blejë një kamion të bashkisë për transportin e plehrave nga Sheqi për në incenerator. Tenderi është rreth 110 mijë euro, ku Subashi kërkon pikërisht këtë mjet. Pasi kanë seleksionuar, përpunuar, plehrat do të shkojnë në incenerator. Kontratat e pastrimit të Fierit duket se nuk parashikonin seleksionimin dhe transportimin për në incenerator. Këto kërkuan kosto shtesë. Taksapaguesit fierakë, por jo vetëm, po paguajnë për pastrimin, seleksionimin, transportimin e madje edhe djegien e tyre.
