Ish-deputeti i LSI, Endrit Braimllari ka zhvilluar sot një takim me banorë të Korçës. Braimllari tha se realiteti është ndryshe në Korçë nga propaganda e shpifur e Kryeministrit.
“Qytetarët nuk marrin shërbime dhe përballen me arrogancën e instuticioneve të Rilindjes. Duhet të marrë fund kjo politikë. 25 prilli ndëshkim popullor”, tha Braimllari.
Ai tha se Kryeministri vjen dhe mashtron qytetarët në Korçë, vjen dhe bën propagandë me projekte imagjinare.
“Ka tetë vite që mashtron. E quan arritje kryeministri që ka vënë një tank me oksigjen në Spitalin e Korçës, ndërkohë që Spitali i Korçës është në realitetin që thatë ju. Ndërkohë të rinjtë dhe të rejat po largohen dhe po braktisin vendin.
Pra, arsye pse ai vjen në Korçë ka të bëjë me propagandën dhe show-n. Realiteti në Korçë nuk është sikurse është gjendja në një apo dy bulevardet e Korçës ku drejtuesit e Rilindjes në këtë qytet, apo oligarkët që Edi Rama i mbështet kanë ndërtuar bizneset e tyre. Realiteti është ndryshe, siç jeni ju në varfëri ekstreme, që shteti nuk ju përgjigjet.
Ndaj, ky është një mesazh i qartë që më 25 prill të japim goditjen e merituar që të marrë fund njëherë e përgjithmonë kjo politikë e papërgjegjshme, arrogante dhe mashtruese, e një njeriu i cili tallet me hallet e qytetarëve të Korçës. Populli duron por më 25 prill do ta godasë rëndë, sepse lotët e tua janë mesazh shumë i qartë për çdo qytetar që do të marrë pjesë masivisht për të goditur këtë fatkeqësi kombëtare”, tha Braimllari.
