Komentari i Kodit të Drejtësisë Penale për të Mitur, i publikuar së fundmi nga magjistratja Tereza Merkaj, është botimi i parë serioz mbi normat e reja ligjore, të miratuar nga Parlamenti në vitin 2017.
Autorja, një gjyqtare me përvojë dhe tashmë pedagoge e Shkollës së Magjistraturës, ka bërë një intepretim dhe analizim në mënyrë të detajuar të të gjitha koncepteve dhe instituteve të reja të Kodit të Drejtësisë Penale për të Mitur.
Analizimi i dispozitave është ndërthurur edhe me praktikën gjyqësore dhe atë të prokurorisë.
Ndjekja penale e të miturve ka qenë një prej pikave më të dobëta të sistemit të drejtësisë në Shqipëri prej shumë vitesh.
Për shkak të mungesës së normave specifike dhe sidomos trajtimit të posaçëm të të miturve në konflikt me ligjin, Shqipëria është kritikuar nga institucionet ndërkombëtare, sidomos ato që kanë në fokus respektimin e të drejtave të njeriut.
Rreth 4 vjet më parë, Parlamenti miratoi ligjin nr. 37/2017 ‘Kodi i Drejtësisë Penale për të Mitur”, i cili shënoi një hap të rëndësishëm cilësor në trajtimin e personave të mitur në konflikt me ligjin.
Pas miratimit të ligjit, sërish sistemi gjyqësor ka hasur në vështirësi për aplikimin e normave të reja ligjore, për shkak të mungesës së botimeve që zbërthenin kodin e drejtësisë për të mitur.
Magjistratja Tereza Merkaj mori përsipër analizimin e Kodit të Drejtësisë për të Mitur, nëpërmjet botimit të Komentarit, i cili do t’ju vijë në ndihmë gjyqtarëve, prokurorë, avokatëve, psikologë, studentë të drejtësi, por edhe vetë të miturve që përballen me ligjin penal.
Gjithashtu, ky Komentar u vjen në ndihmë edhe strukturave të tjera që trajtojnë rastet e veprave penale të kryera nga të miturit, përfshirë oficerët e Policisë Gjyqësore, zyrtarët e Shërbimit të Provës, Njësive të Mbrojtjes së Fëmijëve, medias dhe studiuesve që hulumtojnë këtë fushë specifike të legjislacionit penal shqiptar.
Komentari i autores Merkaj karakterizohet nga një trajtim krahasues i instituteve të Kodit Penal Kodit të Procedurës Penale dhe Kodit të Drejtësisë Penale për të Miturit.
Ai është një punim praktik dhe synon njohjen plotësisht të dispozitave të Kodit të Drejtësisë Penale për të Mitur.
Komentari është hartuar me një gjuhë të qartë profesionale dhe gjendet lehtësisht tek “Libri Universitar” në Tiranë.
