Ish-ministri i Shëndetësisë Tritan Shehu ka reaguar me shqetësim lidhur me lajmin që varianti i ri i koronavirusit është shumë afër Shqipërisë, rastet e para të të cilit u raportuan ditën e djeshme nga autoritetet e qeverisë së Kosovës.
Përmes rrjeteve sociale, ish-deputeti demokrat shprehet se nuk ka asnjë dyshim që këto forma virusale janë prezente dhe tek ne, ndërsa shton se gjetja e tre rasteve në Kosovë të paraprira nga shqetësimet e klinicistëve tanë, janë sinjale serioze.
“Alarmi për “Virusin e ndryshuar” e “qetësia” alla Zhvejk e Komitetit… në fakt në pritje të “zgjimit” të Ramës! Pa asnjë dyshim këto forma virusale janë prezente dhe tek ne, gjetja e tre rasteve në Kosovë të paraprira nga shqetësimet e klinicistëve tanë, janë sinjale serioze.
Por çuditërisht përfaqësuesja e atij Komiteti para 48 orësh nuk shfaqi asnjë shqetësim për mundësinë dhe pasojat e kësaj prezence, përkundrazi…
Ndërsa dy ditë më parë, vetë Kryeministri britanik dha alarmin! Në fakt gjendja jonë, që dhe pa këtë paraqitet shumë e rëndë, do të përkeqësohet!
Ky virus me këto ndryshime ka një shpejtësi përhapjeje 70 % më të lartë, pra kaq shtohen rastet e reja, presioni mbi sistemin shëndetësor aktualisht të pa organizuar e pa përgatitur.
Sipas Kryeministrit britanik, ky virus ka dhe një gravitet të sëmundjes rreth 30 % më të lartë, gjë që do të kërkojë edhe më shumë se ai 70%, mjekime speciale, poste spitalore, reanimacioni, etj.
Ndërsa Kryeministri i ynë vazhdon të heshtë e Komiteti pa gojë bën sikur as shikon e as dëgjon, kur duhej të veprohej me urgjencë.
1- Të realizohen menjëherë mbi 7500 teste PCR (molekulare) në ditë, kur dihet se këto ndryshime mund të dedektohen vetëm nga ky lloj testimi;
2- Të liberalizohen testet e shpejta që të gjenden lirshëm në farmaci, klinika, laboratore, për të relizuar dhjetëra mijëra të tilla në ditë;
3- Mjeku i familjes akoma i pambrojtur e i paorganizuar, duhet të plotësohet e angazhohet;
4- Spitalet periferike, asnjë prej të cilëve nuk ka klinikë Covid operative, duhet të futen në përballje;
5- Të angazhohen të gjitha postet e Reanimacioneve e të krijohen të reja të standardeve;
6- Të bëhen të gjitha përpjekjet që të realizohet vaksinimi i popullsisë, çështje për të cilën jemi në fund të Europës dhe me një perspektivë mjaft të errët.
Sot u miratua nga EMA edhe vaksina AstraZeneca për mbi 18 vjeç, një mundësi e re e madhe kjo, për të cilën duhej të ishte punuar.
Por që këto të kryhen Shqipërisë i duhet një Kryeministër e Qeveri që të reagojë menjëherë për këtë rrezik, sepse koha nuk pret deri më 25 Prill, kur kjo do të ndodhë”, u shpreh ish-deputeti i PD-së, Tritan Shehu.
