Partizani ka bërë një merkato shumë të mirë deri më tani, duke afruar lojtarë me cilësi dhe duke përforcuar tepër organikën, sidomos në repartet e mesfushës dhe të sulmit.
Valentino Murataj dhe Stenio Zhunior ishin dy afrimet e para te “demat”, të cilët u prezantuan njëkohësisht nga drejtori Olsi Rama. Më pas erdhi dhe mbrojtësi i ri, Anteo Osmanllari, që shihet si alternativë e Idrizaj në krahun e djathtë.
Ndërsa dy ditë më parë, u bë dhe prezantimi i Ferhan Hasanit, me “Bubën” që është transferimi më i bujshëm deri më tani.
Aktualisht te Partizani ka vetëm një repart që mund të quhet problematik, sa i takon alternativave. Në mbrojtje, Daja ka pak lojtarë dhe siç e theksoi në prononcimin para sfidës me Teutën, po pret lojtarë që të dublojë repartet, duke lënë të kuptohet se minimalisht do të ketë dy afrime, një qendërmbrojtës dhe një mbrojtës i majtë.
Gjithashtu, Daja tha se ka studiuar alternativa së bashku me drejtorin Rama deri pas mesnate, në tregun e huaj. Kampionati ku Partizani po studion për emra mësohet të jetë ai kroat. Kur jemi futur në ditët e fundit të merkatos, priten nga momenti në moment afrimi i dy mbrojtësve, që me shumë gjasa, mund të bëhen njëkohësisht.
Drejtori i përgjithshëm i Partizanit, Olsi Rama, ka qenë ai që ka prezantuar afrimet e janarit te “demat”. Por mësohet se ditët e fundit, ka pasur një ndryshim në vendimmarrje te Partizani, pasi çdo emër që afrohet te Partizani, do të kalojë fillimisht në tavolinën e Dajës, për të marrë përgjigjen finale. Tani, strategu 54-vjeçar do të jetë ai që do të japë OK-in final për afrimet e Partizanit, pasi në klub nuk duan të përsërisin afrime që kanë dështuar, pasi ka disa raste në të shkuarën, më së fundmi me Braun, që u largua pak ditë më parë./Panoramasport
