Epidemiologu Ilir Alimehmeti, foli në studion e ABC për rritjen e numrit të infektuarve me koronavirus si edhe procesin e vaksinimit.
Epidemiologu tha se asnjë vaksinë nuk është 100% efektive, ndërsa citon kompaninë “Pfizer” shton se edhe pas marrjes se dozës së dytë efektiviteti sërish është më pak se 100%.
Gjatë bisedës në studio me gazetaren Juli Xhokaxhi ai tha se efektiviteti fillon pas 10 ose 12 ditësh dhe shton se edhe pas marrjes së dy dozave të vaksinës mbrojtja nuk është 100%.
“Doza e parë ka efektivitet eksperimental, siguri nuk ke kurrë me vaksinë kjo për shumë arsye. Mund të jetë një trup që nuk reagon mirë ndaj vaksinës, por ka edhe disa lloje njerëzish që nuk mund të vaksinohen si shtatzënat apo edhe fëmijë”, tha epidemiologu.
I ndalur tek infektimi i mjekut Pëllumb Pipero, i cili edhe u vaksinua, ai tha se ka shumë pikëpyetje duke sqaruar se studimet dhe të dhënat janë shumë të varfra për të dhënë përgjigje të sakta dhe të drejtpërdrejta.
Sa i përket mutacioneve të reja të Covid-19 Alimehmeti u shpreh se virusi bën mutacione në mënyrë të vazhdueshme dhe se këtë e bën çdo lloj virusi, por më rëndësi është që qytetarët të mos humbin vigjilencën.
