Nga Boldnews.al
Përgjimet e publikuara në media, ku disa anëtarë të organizatës mafioze italiane Ndrageta, bisedojnë me njëri tjetrin për investime në Shqipëri, ku duhet të paguajnë “pizzën” (ryshfetin) prej 20 %, kanë nxjerrë në dritë emra politikanësh dhe biznesmenësh. Një nga emrat e përmendur është edhe “Niku”, i cili identifikohet si drejtues i rrjetit “Sol”, rrjet i cili në Shqipëri ka hapur firmën GTS- Gazra Teknike Shqiptare! Një kompani, që fushën e veprimit në vendin tonë e ka me spitalet publike dhe private.
Sipas QKB, administrator është z.Besnik Halili. Boldnews ka investiguar më herët monopolin e tënderave të blerjes së oksigjenit, apo edhe çiftin Besnik Halili-Luneda Sufalin. Kjo e fundit drejtoreshë e Shërbimit Social Shtetëror. Por, në këtë hulumtim, ne do të analizojmë disa procedura tenderimi të kryera nga Ministria e Shëndetësisë dhe Spitali Shefqet Ndroqi.
Më herët publikuam se GTS ks fituar mbi 20 tendera në Shëndetësi. Tashmë, nga një vëzhgim i thjeshtë i dokumenteve që ne disponojmë, rezulton se i “besuari” i Ndragetës ka fituar plot 5 milionë euro vetëm në 2 tendera. Procedurat e Manastirliut duket se janë fiktive, pasi në rastin e parë GTS bashkëpunon me “kundërshtarin” dhe në rastin e dytë, është e vetme në tender, duke fituar me 100 % të vlerës së akorduar.
(Tenderi 4 milionë euro i shëndetësisë)
GTS, 4 milionë euro bashkë me “kundërshtarin”!
Në javët e parë të Covid 19 në Shqipëri, përkatësisht në fund të muajit mars dhe në muajin prill 2020, Ogerta Manastirliu urdhëroi bërjen e një super tenderi me vlerë rreth 60 milionë euro për përballimin e pandemisë. E ndau me dhjetëra lote, ku ndër to ishim edhe 2 lote për oksigjenin, lote të cilat kishin një vlerë prej rreth 4 milionë euro.
Sipas dokumenteve që disponon Boldnews, kohëzgjatja e kontratës ishte për 24 muaj, pra për dy vite. Në dokumente thuhet se për lotin 41, me objekt “Oxygen Gaz për përdorim mjekësor, i kompresuar x 100%” (në dokument ka gabime të mëdha ortografike), është paraqitur bashkimi i operatorëve ekonomikë GTS dhe Messer Albagaz. Ndërkohë, për lotin 42, oksigjen i lëngshëm, është paraqitur i njëjti bashkim opëratorësh: GTS dhe Messer Albagaz shpk. Rrjedhimit, u shpallën edhe fituesë, pasi nuk kishin kundërshtarë! Por, nëse do të analizojmë tenderët e tjerë apo edhe këtë treg, rezulton se vetëm këto dy kompani e orfrojnë oksigjenin spitalor. Dhe, kur këto firma bëhen bashkë apo kanë marrëveshje me njëra tjetrën, nuk ka garë.
Në Senatorium, i vetëm në garë me 100 % të fondit!
Nëse justifikimi për tenderin e parë ka qenë fillimi i pandemisë, i dyti u bë muaj më vonë, kur gjendja ishte stabilizuar dhe kishte kohë mjaftueshëm të përpiloheshin dokumentet. Boldneës ka siguruar dokumentet e tenderit me objekt “blerje oksigjen, gaz për përdorim i lëngshëm” për nevoja të Senatoriumit. Fondi për këte tender ka qenë rreth 800 mijë euro. Dhe kjo shumë, do të paguhej për 70 ditë! Në tender mori pjesë vetëm kompania “GTS- GAZRA TEKNIKE SHQIPTARE”, e cila ofroi 85.302.000 lekë. Aq sa ishte edhe fondi i akorduar nga Senatoriumi.
Në të dyja procedurat ka mjaft pikëpyetje që fare mirë mund të zbardhen nga hetime penale apo administrative; kush duhet ta luftojë këtë monopol? Ku është prokuroria, SPAK-u dhe Autoriteti i Konkurencës?
Normalisht, skemat e abuzimit me tenderat sa vijnë dhe po sofistikohen. Por, ajo që është më shqetësuese është se kemi të bejmë me të njëjta skema si në Italinë e viteve ’80-’90, vite në të cilat lulëzonin grupet mafioze, ndër to edhe Ndrageta.
