Komisioni për Ankimet dhe Sanksionet i drejtuar nga Ilir Rusmajli vendosi sot t´i heqë edhe gjobën qesharake prej 1500 lekësh që iu vendos drejtorit të Kadastrës së Lushnjes lidhur me disa çertifikata pronësie që ishin shpërndarë nda deputeti socialist Bujar Çela.
Ky i fundit u shfaq para disa javësh duke shpërndarë çertifikata pronësie, ndërsa nuk dihet se si këto dokumente zyrtare i ishin dhënë ligjvënësit socialist.
KQZ ka miratuar një akt normativ, ku ndër të tjera ndalon dhënien e çertifikatave të pronësisë apo legalizimeve 4 muaj para zgjedhjeve, duke synuar kështu të ndalojë përdorimin e administratës në fushatën zgjedhore.
Por ky akt normativ është shpërfillur deri më tani, ndërsa rasti i parë i denoncuar ishte ai i Kadastrës së Lushnjes.
Zyrtari i Rilindjes u gjobit me 1500 lekë, një masë administrative qesharake e vendosur nga Ilirjan Celibashi, por që u ankimua nga kreu i Kadastrës së Lushnjes.
Vendimi në KAS u mor me 3 vota pro dhe dy kundër. Ilir Rusmajli i bashkoi votat e tij me të dy anëtarëve të tjerë të propozuar nga PS, dhe pranoi kërkesën e drejtorit të Kadastrës së Lushnjes për pafajësi. Ndërsa dy anëtarët e tjerë të propozuar nga opozita, mbështetën kërkesën e LSI-së që Arben Qalliu të ndëshkohej më shumë se sa 15 mijë lekë të vjetër.
