Komisioni Qendror i Zgjedhjeve nuk ka para për të lidhur kontratën me kompaninë private për identifikimin elektronik të qytetarëve në zgjedhje. Në dhjetor të vitit të kaluar qeveria akordoi 5 milionë euro për të nisur procedurat e prokurimit.
KQZ ftoi kompanitë të jepnin ofertat dhe procedura u mbyll në janar të këtij viti. Duke qenë se paratë nuk u harxhuan nga KQZ-ja, buxheti i tyre u zerua. Ndërkohë, pak javë më parë u shpall fituese kompania “Smart Matic” për realizimin e projektit të identifikimit. Kur na ndajnë më pak se 100 ditë nga zgjedhjet, aktualisht sipas burimeve KQZ-së, është duke përgatitur termat konkret të kontratës, por deri tani ajo nuk ka ende fondin për të lidhur kontratën.
Burimet i thanë gazetës “Panorama.al” se dy ditë më parë KQZ-ja i ka dërguar qeverisë kërkesën për të bërë alokimin e fondit prej rreth 16 milionë eurosh, në mënyrë që në momentin më të parë të firmoset kontrata dhe të nisë implementimi. Ndërkohë, nuk ka informacion nëse është kaluar buxheti nga qeveria.
Anëtarët në KZAZ
Nga ana tjetër, Komisioni Qendror i Zgjedhjeve vijon përgatitjet për zgjedhjet e 25 prillit.
Përmes një njoftimi për shtyp, KQZ-ja njoftoi dje se ka përfunduar shqyrtimi i propozimeve të PD-së, LSIsë e PSD-së për anëtarë dhe sekretarë të KZAZ-ve, bashkë me dokumentacionet përkatëse. Në njoftim thuhet se “rezulton se PD-ja, PS-ja, LSI-ja i kanë plotësuar kërkesat ligjore për propozimet e tyre, ndërsa PSD-ja ka bërë dorëzim të pjesshëm të propozimeve për anëtarë të KZAZ-ve”.
Pas përfundimit të depozitimit, shqyrtimit dhe plotësimit të dokumentacionit, KQZ-ja bën me dije do të vijojë me emërimin e tyre dhe më pas me ngritjen dhe konstituimin e KZAZ-ve. “Referuar Kodit Zgjedhor, vendimit nr. 5, datë 07.01.2021 të Komisionit Rregullator dhe vendimeve nr. 40, datë 23.12.2020 dhe nr. 5, datë 07.01.2021 të Komisionerit Shtetëror të Zgjedhjeve, të drejtën për të propozuar anëtarë dhe sekretarë të KZAZ-ve e kanë Partia Socialiste e Shqipërisë, Partia Demokratike e Shqipërisë, Lëvizja Socialiste për Integrim, dhe Partia Social Demokrate.
Këto parti politike dorëzuan brenda afatit propozimet e tyre, të cilat u morën në shqyrtim nga administrata e KQZ-së. Sipas procedurave ligjore, në rastet e konstatimit të mangësive apo parregullsive, partitë politike u njoftuan për plotësimin e dokumentacionit. Aktualisht, ka përfunduar shqyrtimi i propozimeve dhe dokumentacionit përkatës të propozimeve për anëtarë dhe sekretarë të KZAZ-ve, ku rezulton se PD-ja, PS-ja, LSI-ja i kanë plotësuar kërkesat ligjore për propozimet e tyre, ndërsa PSD-ja ka bërë dorëzim të pjesshëm të propozimeve për anëtarë të KZAZ-ve.
Pas përfundimit të depozitimit, shqyrtimit dhe plotësimit të dokumentacionit për propozimet për anëtarë dhe sekretarë të KZAZ-ve, KQZ-ja do të vijojë me emërimin e tyre dhe më pas me ngritjen dhe konstituimin e KZAZ-ve”, njoftoi zyra e medias e KQZ-së.
