Ambasada e Federatës Ruse në Tiranë i quan të pabazuara të gjitha arsyet e dhëna nga Ministria e Punëve të Jashtme të Shqipërisë për dëbimin e diplomatit rus.
Në një deklaratë të publikuar nga mediat ruse, Ambasada shton se për këtë veprim të Shqipërisë është njoftuar dhe Ministria e Jashtme e Rusisë.
“Ne i konsiderojmë të pabazuara të gjitha akuzat ndaj diplomatit rus të përmendura në këto dokumente. Ne gjithashtu vërejmë se zbulimi në njoftimin për shtyp i emrit të punonjësit tonë kundërshton ashpër praktikën e vendosur ndërkombëtare diplomatike. Ministria e Jashtme ruse është informuar,” citohet në deklaratë.
Më tej media ruse shton se Ministria nuk specifikon se cilat masa anti-COVID kishte shkelur diplomati nga veprimet e tij.
Ky reagim i ambasadës ruse vjen pas njoftimit të Ministrisë së Jashtme për dëbimin e diplomatit Mikhail Afanasiev. Sipas ministrisë diplomati ka shkelur në mënyrë të vazhdueshme masat anti COVID-19. Diplomati mbante postin e Sekretarit të Dytë të Ambasadës dhe atij i është lënë një afat 72 orësh për tu larguar nga Shqipëria.
